مەودا میدیا-
بڕیارە سبەینێ‌ دادگای فیدراڵی عیراق تایبەت بە چەند دۆسیەیەك كۆببێتەوە كە یەكێك لە دۆسیەكان سكاڵایەكە بۆ داخستنی كەمپی ئاوارەكان لە هەرێمی كوردستان.

بەپێی خشتەی دانیشتنەكانی دادگای فیدراڵی، دانیشتنی یەكەم لەسەر سكاڵایەكی ئیڤان فایەق، وەزیری كۆچ و كۆچبەرانی عیراق دەبێت كە لە دژی هەریەك لە سەرۆكی هەرێم و سەرۆكی حكومەتی هەرێم و وەزیری ناوخۆی هەرێم تۆماریكردووە، كە تایبەتە بە گەڕ‌اندنەوەی ئاوارەكان و داخستنی كەمپەكان. 

ئەو سكاڵایەی وەزیری كۆچ و كۆچبەرانی عیراق لە كاتێكدایە كە لە ماوەی رابردوودا حكومەتی عیراق بڕیاریدا بە داخستنی سەرجەم كەمپی ئاوارەكان لە عیراق و هەرێمی كوردستان و گەڕانەوەیان بۆ شوێنی خۆیان، بەڵام سەرەڕای بڕیارەكە حكومەتی هەرێم رەتیكردەوە كە كەمپەكان دابخات و تائێستاش لە هەرێم كەمپەكان ماون و بەشێكی زۆری ئاوارەكانیش تیایاندا ماونەتەوە. 
ئ.پ