مه‌ودا میدیا-

هونه‌رمه‌ند و شاعیرى ناودارى كورد "عەباسی کەمەندی" ته‌واوى ته‌مه‌نى مرۆڤ به‌ شه‌ش ده‌یه‌ له‌ شیعرێكدا وه‌سف ده‌كات و بەم شێوەیە ساڵانی ژیانمان  باس ده‌كات.

عەباسی کەمەندی، دەڵێت:

‎تەواوی ژیان شەش دەیە وە ساڵ
‎لەدوای شەش دەیە عومرێکی بەتاڵ

‎دە ساڵی ئەوەڵ کایە و پێکەنینن
بێ خەم، بێ خەفەت شایی قرم و قاڵ

‎دە ساڵی دووەم هەرزەکارییە
‎کاتی کەوتن و دەرهاتن لە چاڵ

‎دە ساڵی سێیەم عشق و ئاواتە
‎بەدی هاتنی خێزان و مناڵ

‎دە ساڵی چوارەم هەڵسوکەوتی ژین
‎کەمەر ئێشان و ماندووبوونی باڵ

‎دە ساڵی پێنجەم بیری قیامەت
‎دە ساڵی شەشەم، پڕ لە نک و ناڵ

‎لەدوای شەش دەیە هەر عومرێ مابێ
‎چاو کوێر و پا شەل، زوان لەنگ و لاڵ

‎دەگا بە کاتێ ئینسان بۆ ئەولاد‎
دەبێ بە گەنە و، سەربار و وەباڵ

‎جۆرێ بمکوژە، خوایه‌ بۆ یەک شەو
‎نەخۆش نەکەوم، بکەومە گۆشەی ماڵ

پ ح ع