مەودا میدیا-

ئەمڕۆ چوارشەممە 2024/12/25، هێزە شیعییەکانی چوارچێوەی هەماهەنگی کۆبوونەوەو مانەوەی هێزەکانی ئەمریکایان لە عیراق رەتکردەوە.

موختار موسەوی، ئەندام لە چوارچێوەی هەماهەنگی شیعەکان رایگەیاند "حکومەت و پەرلەمانی عیراق هیچ پلانێکیان نییە بۆ درێژکردنەوەی وادەی مانەوەی هێزەکانی ئەمەریکا لە عیراق".

ئاماژەی بۆ ئەوەشکرد "هیچ مەترسییەکی ئەمنیی نییە و پێشهات و رووداوەکانی سوریاش کە لەئێستادا سەرکردایەتی ئەو وڵاتە لە دەستی چ هێز و سەرکردەیەکدایە کاریگەریی لەسەر دۆخی ناوخۆیی عیراق نییە".

ئەوەشی خستەڕوو "راگرتنی هێرشە ناوخۆییەکان بۆ سەر بنکە و بارەگاکانی ئەمەریکا پەیوەندی بە کات و خشتەی کشانەوەی هێزەکنی ئەمەریکا هەیە لە عیراق، لە ئەگەری پابەند نەبوون بە کشانەوەی هێزەکانی، هێرشی چەکداریی بۆ سەر بەرژەوەندیی و بنکە و بارەگاکانی ئەمەریکا دەستپێدەکاتەوە".

وتیشی "چوارچێوەی هەماهەنگی لەرێی فراکسیۆنەکانییەوە بەدواداچوون بۆ خشتەی کشانەوەی هێزەکانی ئەمەریکا لە عیراق دەکات، هیچ لایەنێکیش بە درێژکردنەوەی وادەی مانەوەی هێزە بیانییەکان لە عیراق رەزامەند نەبووە".

ب ح