مەودا میدیا-

بەڕێوەبەری نەخۆشخانەی نانەكەلی لە هەولێر ئاشکرایکرد پڕۆژەی رووناكی جگە لە پاککردنەوەی ژینگە، كاریگەریشی لەسەر كەمكردنەوەی ژمارەی تووشبووان بە شێرپەنجە دەبێت.

د.هەردی جەواد، بەڕێوەبەری نەخۆشخانەی نانەكەلی لە هەولێر رایگەیاند: پڕۆژەی رووناكی لە داهاتوودا كاریگەری لەسەر كەمكردنەوەی ژمارەی تووشبووان بە شێرپەنجە دەبێت، چونكە زیاتر لە هەزار موەلیدە كوژێنراونەتەوە كە رۆژانە دووكەڵی ژەهراوییان بڵاوکردووەتەوە و ژینگەیان پیسکردووە".

ئاماژەی بۆ ئەوەشکرد "بەراورد بە ساڵی رابردوو، ئەمساڵ ژمارەی تووشبووانی شێرپەنجە زیادیكردووە، بەڵام زۆربەیان دانیشووی پارێزگاكانی باشوور و ناوەڕاستی عیراقن و لە نەخۆشخانەكانی هەرێمی كوردستان چارەسەر وەردەگرن".

ئەوەشی خستەڕوو " حكومەتی هەرێم بودجەیەكی تایبەتی بۆ تووشبووانی شێرپەنجە تەرخان كردووە و خێرخوازانیش هاوكارن لە دابینكردنی دەرمان، هەروەها وەزارەتی تەندروستی عیراق بڕێكی زۆر كەم دەرمان و هاوكاریی تەندروستییان بۆ دابین دەكات و بەشی هەفتەیەك ناكات".

ب ح