مەودا میدیا-
بەهۆی خراپی دۆخی ئابووری و بە مەبەستی كەمكردنەوەی ئەركی دارایی هاوڵاتییان، وەزارەتی خوێندنی باڵا و توێژینەوەی زانستی بڕیاریدا ئەمساڵیش داشكاندن بۆ كرێی خوێندن بەردەوام بێت. 

عەباس ئەكرەم، وتەبێژی وەزارەتی خوێندنی باڵا و توێژینەوەی زانستی حكومەتی  هەرێم  رایگەیاند"بەهۆی ئەوەی ئەمساڵیش هاوشێوەی ساڵانی رابردوو دۆخی دارایی هاوڵاتییان بە گشتی باش نییە، بۆیە بڕیاریانداوە داشكاندنی نرخی كرێی خوێندنی خوێندكارانی زانكۆ و پەیمانگاكان بەردەوام بێت". 

وتیشی"لە زانكۆ و پەیمانگا حكومییەكان تاوەكو 45% داشكاندن بۆ كرێی خوێندنی پارالێل دەكرێت و لە زانكۆ و پەیمانگا  ئەهلییەكانیش تا %25 داشكاندن دەكرێت كە ئەوەش بە گوێرەی ئەنجامەكانی ریزبەندی نیشتمانی زانكۆكان دەبێت لە هەرێمی كوردستان ".

ئاماژەی بۆ ئەوەشكرد"لە داشكاندنەكەدا هیچ جیاوازییەك لە نێوان كرێی خوێندنی پارالێل لە بەیانیان و ئێواران ناكرێت".

باسی لەوەشكرد"ئەمساڵیش لێخۆشبوون بۆ كرێی خوێندنی منداڵان و كەسوكاری شەهیدان و ئەنفالكراوان بەردەوام دەبێت". 
ئ پ