مەودا میدیا-

ئەندامێکی پەرلەمانی کوردستان ئاشکرایکرد لە سەرەتای ئەمساڵەوە داهاتی ناوخۆ بە پێی ژمارە و داتای خۆیان نزیکەی ( دوو تریلیۆن و نیو) دینار بووە، لەو بڕە نزیکەی (یەک ترلیۆن) دیناری بۆ خەرجی وەزارەت و خزمەتگوزاریی خەرجکراوە، نزیکەی (320 ملیار) دیناریش نێردراوە بۆ وەزارەتی دارایی فیدراڵ.

عومەر گوڵپی، ئەندامی پەرلەمانی کوردستان بە مەودا میدیای راگەیاند "لەئێستادا نەوەک (120 ملیار) دینار، بەڵکو هەرێمی کوردستان زیاتر لە (یەک ترلیۆن و 200 ملیار) دینار پارەی لەبەردەستە، خراوەتە خەزێنەی گشتیی وەزارەتی دارایی یان لە خەزێنەی حزبەکانی دەسەڵاتە".

ئاماژەی بۆ ئەوەشکرد "بەرهەمهێنانی نەوتیش نزیکە لەوەی بگەڕێتەوە بۆ دۆخی پێش درۆنەکان و بەردەوامیشن لە فرۆشتنی بە تانکەر و پاڵاوگە، واتە ئێستا دەسەڵات و کابینە ماوە بەسەرچووەکەیان لە کوردستان زۆر بە ئاسانی دەتوانن هەردوو بڕگەی رێککەوتنەکەیان لەگەڵ بەغدا جێبەجێ بکەن".

ئەوەشی خستەڕوو "حکومەتی هەرێم بە ئاسانی دەتوانێت بڕی پێویستی نەوت لە رێگەی سۆمۆوە بفرۆشنێت و بڕی (120 ملیار) دیناریش لە پشکی وەزارەتی دارایی فیدراڵ بنێرێت، ئەگەر ئەمە ناکەن واتە بە مەبەست دەیانەوێت خەڵک برسی بێت، نە خۆیان مووچە دەدەن نە لەگەڵ بەغداش رێککەوتنەکەیان جێبەجێ دەکەن تاوەکو مووچەی خەڵک بێت".

ب ح