مەودا میدیا-
سەرۆكایەتی شارەوانی هەولێر ئاشكرایدەكات كە لە بری پێدانی كارتی زەوی بە فەرمانبەران، راستەوخۆ زەوییەكانیان تاپۆدەكرێت، ئەوەش بۆ ئەوەی كێشەی یاسایی دروست نەبێت.

كارزان هادی، سەرۆكی شارەوانی هەولێر راگەیاند"لەمەودوا ئەو زەوییانەی بەسەر فەرمانبەراندا دابەش دەكرێن بە كارت نابن، بەڵكو راستەوخۆ بەناوی خودی فەرمانبەری سوودمەندبوو تاپۆ دەكرێت، بۆیە ئەو زەوییانەی دابەشكراون وێنەی تۆماریان بۆ ئامادە دەكرێت، بۆ ئەوە لە بەڕێوەبەرایەتییەكانی تۆماركردنی خانووبەرە راستەوخۆ بكرێت بەناوی فەرمانبەرەكەوە". 

وتیشی"پێشتر دابەشكردنی كارتی زەوی چەندین كێشە و گرفتی خێزانی و كۆمەڵایەتی دروست دەكرد، چونكە مامەڵەیەكی زۆری پێدەكرا، بۆیە ئێستا بۆ نەهێشتنی ئەو كێشانە راستەوخۆ تاپۆكردنی زەوییەكان چارەسەرێكی گونجاوە". 

ئاماژەی بۆ ئەوەشكرد"تا ئێستا بە دوو قۆناغ زەوی بەسەر فەرمانبەراندا دابەشكراوە و  تیمەكانی سەرۆكایەتی و شارەوانییەكانیش كار لەسەر كوژاندنەوەی زەویی دیكەی كشتوكاڵی دەكەن بۆئەوەی دوای رووپێوكاریی قۆناغی سێیەمیش دابەش بكەن". 
ئ پ