مەودا میدیا-
لە هەندێك لە پەڕە تایبەتییەكانی هاوڵاتییانی گەرمیان وێنەی پارچە ئاسنێك بڵاوكراوەتەوە كە راوچییەكان لەكاتی راوكردن و دواكەوتنیان لەلایەن پۆلیسەوە بەكاریدەهێنن بۆ پەكخستنی  ئۆتۆمبێلەكانیان. 

یەكێك لەو كەسانە چەند وێنەیەكی بڵاوكردووەتەوە و ئاماژەی بۆ ئەوەكردووە"لە نێوان گوندی كانیی بۆرەكە بۆ ئەلیپەكان چەندین پارچە ئاسنی دانراوە بۆ پەنچەركردنی تایەی ئۆتۆمبێلەكانی پۆلیس، بەڵام بەهۆیەوە چەندین ئۆتۆمبێلی مەدەنی و پۆلیسیش زیانیان پێگەیشتووە". 

لە بارەی ئەو كارەشەوە ئارام محەمەد، لێپرسراوی بنكەی پۆلیسی دارستان و ژینگەی پێباز بە مەودا میدیای راگەیاند" لە سنوری بنكەكەی ئەوان تا ئێستا رووبەڕووی هیچ حاڵەتێكی لەو شێوەیە نەبووەنەتەوە، بەڵام هاوكارانیان لە هەندێك لە بنكەكانی سنورەكە باسیان لە بوونی ئەو حاڵەتە كردووە و بەڵێ‌ هەیە". 

وتیشی"مەترسی ئەو پارچە ئاسنانە لەوەدایە كە راوچییەكان فڕێی دەدەن و دەڕۆن و دواتریش هەڵیناگرنەوە، بۆیە ئەوە نەك تەنها زیان بە ئۆتۆمبێلەكانی پۆلیس دەگەیەنێت، بەڵكو زیان بە ئۆتۆمبێلی هاوڵاتییانی مەدەنیش دەگەیەنێت".  
ئ پ