مه‌ودا میدیا-

ئه‌ندامێكى په‌رله‌مانى عیراق له‌ فراكسیۆنى یه‌كگرتووی ئیسلامیی كوردستان رایگه‌یاند، به‌غدا بڕیارى خۆى له‌سه‌ر چاره‌سه‌رى مووچه‌ى فه‌رمانبه‌رانى هه‌رێم داوه‌ و چاره‌سه‌ر لاى هه‌رێمه‌ كه‌ پابه‌ندبێت.

دارا سێكانیانى، ئه‌ندامێكى په‌رله‌مانى عیراق له‌ فراكسیۆنى یه‌كگرتووی ئیسلامیی كوردستان به‌ مه‌ودا میدیاى رایگه‌یاند "هه‌رێمى كوردستان ده‌بێت ئه‌وه‌ بزانێت كه‌ رێككه‌وتن و چاره‌سه‌ر له‌سه‌ر بنه‌ماى پابه‌ندبوونه‌، ئه‌مه‌ بۆ به‌غداش هه‌مان شته‌و پێویسته‌ ئه‌و دوو لایه‌نه‌ پابه‌ندبن به‌ رێككه‌وتنه‌كان، ئه‌و مه‌رجانه‌شى دانراون بۆ هه‌رێم هه‌مان رێككه‌وتنه‌كه‌ى رابردووه‌".

وتیشى "ده‌بێت راستییه‌كان به‌ خه‌ڵك بوترێت، با سه‌رۆكى حكومه‌تى هه‌رێم خۆى بخاته‌ شوێنى سه‌رۆكى حكومه‌تى عیراق و سه‌رۆكى حكومه‌تى عیراقیش له‌ شوێنى سه‌رۆكى حكومه‌تى هه‌رێم بێت، ئه‌وكات بزانین ئه‌گه‌ر سه‌رۆكى حكومه‌تى عیراق به‌بێ ئه‌وه‌ى نه‌وت و داهاتى راده‌ست بكرێت، ئاماده‌یه‌ مووچه‌ و پاره‌ بۆ هه‌رێم بنێرێت".

ئه‌وه‌شى خسته‌ڕوو "ناكرێت به‌هۆى كێشه‌ سیاسییه‌كانه‌وه‌ فه‌رمانبه‌رانى هه‌رێمى كوردستان برسى بكرێن و بكرێنه‌ قوربانیی، خۆزگه‌ شته‌كه‌ عیراق بوایه‌ با بمان وتایه‌ هه‌رێم پابه‌ندبووه‌ و به‌غدا خه‌ڵك برسى ده‌كات، به‌ڵام كه‌ هه‌رێم نه‌وت و داهات راده‌ست نه‌كات به‌غداش پاره‌ نانێرێت".

ع