مەودا میدیا-

هاوسەرۆکی پارتی یەکسانی و دیموکراتیی گەلان (دەمپارتی)ئاشکرایکرد ئەگەر پڕۆسەی ئاشتی سەربگرێت سیاسەتی نکۆڵیکردنی کورد کۆتایی دێت و زیندانیکراوان ئازاد دەبن.

تونجەر باقرخان، هاوسەرۆکی دەمپارتی رایگەیاند " دەیان هەزار سیاسیی کورد، تەنها بەهۆی ئەوەی بەرگرییان لە مافی گەلەکەیان کردووە و خەباتیان بۆ زمان و ناسنامەی کورد کردووە لە زیندانەکانی تورکیادان".

ئاماژەی بۆ ئەوەشکرد "ماوەی 100 ساڵە گەلانی رۆژهەڵاتی ناوەڕاست دەچەوسێندرێنەوە، بەڵام ئێستا لە قۆناغێکی نوێدان و دەرفەتێکی نوێ هاتووەتەپێش کە گەلانی ناوچەکە دەیانەوێت بە ئازادی و یەکسانی بژین".

ئەوەشی خستەڕوو "ملیۆنان کورد لە باکووری کوردستان و تورکیا ناتوانن بە زمانی خۆیان قسە بکەن، تەنانەت لەو لیژنە پەرلەمانییەی بۆ پڕۆسەی ئاشتی دروستکراوە، رێگەیان بە دایکانی کورد نەدا بە زمانی خۆیان قسە بکەن".

باسی لەوەشکرد "ئەگەر پڕۆسەى ئاشتی و دیموکراسی جێبەجێ بکرێت کاریگەری لەسەر رۆژئاواى کوردستان دەبێت و داواى پێکهێنانى سیستمێکى دیموکراسی بۆ سوریا دەکەن".

ب ح