مەودا میدیا-

ئیدارەی سەربەخۆی گەرمیان بڵاویکردەوە لەئێستادا ناونووسین بۆ ئەم ساڵی خوێندن لە ناوەندی پەروەردەی پێشوەختەی کەلار کە ناوەندێکی حکومی بێبەرانبەرە، بۆ منداڵانی خاوەنپێداویستیی تایبەت دەستپێکردووە.

ئیدارەی سەربەخۆی گەرمیان رایگەیاند "ناوەندەکە خزمەتگوزارییەکانی پشتیوانیی حکومی بەردەوام، راهێنانی تایبەت و بێبەرانبەر بەپێی پێداویستی هەر منداڵێک، راهێنان لەرووی (جەستەیی-دەروونی-ژیری)یەوە، بەشداریکردنی باوانی منداڵ لەپرۆسەی گەشەپێدان و راهێنانی جگەرگۆشەکانیاندا پێشکەش دەکات".

ئاماژەی بۆ ئەوەشکرد "وەرگرتنی منداڵ لەسەر بنەمای چەند  پێوەرێک بۆ ئەم ساڵی خوێندن وەک ئەزمونێکی نوێ سنووردارە و دەبێت تەمەنی منداڵی خاوەنپێداویستیی تایبەت لە خوار شەش ساڵان دەبێت، بۆ ناوتۆمارکردن پێویستە ناسنامە و راپۆرتی پزیشکی کە دەستنیشانی حاڵەتی منداڵەکەی کردبێت".

ب ح