مەودا میدیا-

ئەندامێکی پەرلەمانی کوردستان ئاشکرایکرد کارەبای 24 کاتژمێری پڕۆژەیەکی زۆر گرنگە و خواستی  33 ساڵەی هاوڵاتییانە و بەهۆی فاشلی بەڕێوەبردن نەیانتوانی ئەو خواستە سادە بەدیبهێنن.

کاوە عەلی کەریم، ئەندامی پەرلەمانی کوردستان بە مەودا میدیای راگەیاند "بە گرانکردنی نرخ و سەرخستنی پڕۆژەکە و قازانج کردن بەسەر هاوڵاتییان و رەچاو نەکردنی بژێوی خراپی خەڵک و پشتگوێ خستنی یاسا و رێنماییەکان روویەکی ناشرینی حوکمڕانیان  پێشکەش کرد".

ئاماژەی بۆ ئەوەشکرد "بە نایاسایی نرخەکان بەرزکراونەتەوە و گرێبەست بە دەر لە رێنمایی لەگەڵ کۆمپانیای بیانی و ناوخۆیی  کراوە، هەرچەندە یاسا لەئێستادا پەراوێزترینە بۆ دەسەڵاتداران، بەڵام  بە حەرفی بەسەر هاوڵاتییاندا جێبەجێ دەکرێت".

ئەوەشی خستەڕوو "هەموو پارێزگای هەڵەبجە هێندەی دوو کارگە کارەبای پێویست نییە هەمووی 38 هەزار هاوبەشە و  باشترین خزمەتی  کاریگەر و دوور لە موزایەدە ئەوەیە نرخەکان لەسەر هاوڵاتییان کەمبکەنەوە و رەچاوی بژێوی هاوڵاتیان بکەن، وەرزی زستان دەردەکەوێت (توانای ژێرخانی کارەبای هەرێم چەندە) ".

ب ح