مه‌ودا میدیا-

سەباحەت تونجەل، پەرلەمانتاری پێشووی هەدەپە داوا ده‌كات رێگە بە عەبدوڵڵا ئۆجەلان، رێبەری زیندانیکراوی پەکەکە بدرێت بچێتە پەرلەمان و سیاسەت بکات، وەک چۆن دەوڵەت باخچەلی، سەرۆکی مەهەپە، پێشتر داوای کردبوو.
 
تونجه‌ل له‌و باره‌وه‌ ده‌ڵێت "ئۆجەلان ساڵانێکە هەوڵی گفتوگۆ دەدات و پڕۆسەی ئاڵۆزی رۆژهەڵاتی نێوەڕاست تورکیای ناچار کردووە بەرەو هاوپەیمانێتییەکی نوێی کورد-تورک بڕوات".

وتیشى "ئۆجەلان وەڵامی بانگەوازی دەوڵەتی دایەوە، ئەم پڕۆسەیە بە بانگەوازی ئاشتیی و کۆمەڵگای دیموکراسیی گەیشتە قۆناخێکی تر، بۆیە ئەو لیژنەیەی لە پەرلەمان دامەزراوە پێویستە گوێ لە ئۆجەلان بگرێت، ئەگەر لیژنەکە ناتوانێت بچێتە لای، دەبێت مەرجەکانی هاتنی ئۆجەلان بۆ پەرلەمان بڕەخسێنرێت".
 
سەباحەت تونجەل رەتیکردەوە کە دەم پارتی و ئاکپارتی رێککەوتنیان کردبێت بۆ هاوپەیمانیی هەڵبژاردن و وتى "ئەوان لەڕووی ئایدۆلۆژیاوە لەگەڵ ئاکپارتی جیاوازن، ئێمە لە رەهەندی دیموکراسی و ئازادیخوازیی ژنانەوە نزیک دەبینەوە لە کێشەکان. بۆیە ناتوانین لە هەموو بابەتێکدا نە لەگەڵ ئاکپارتی و نە لەگەڵ جەهەپەدا بەیەکەوە بین".

ع