مه‌ودا میدیا-

بەڕێوەبەرایەتیی ئاسایشی شارەزوور کۆتا مۆڵەتی بۆ تۆمارکردنی ئۆتۆمبێلە بێسەرەتاکان دیاریکرد، ئاشکرایکرد، پاش ئەو وادەیە ناتوانن خۆیان تۆماربکەن.

لە راگەیەندراوێکی بەڕێوەبەرایەتیی ئاسایشی شارەزوور هاتووە "پێویستە سەرجەم ئەو ئۆتۆمبێلە بێسەرەتایانەی خۆناساندنیان بۆ نەکراوە و تۆمارنەکراون، سەردانی بەشی جموجوڵی بەڕێوەبەرایەتییەکە بکەن بەمەبەستی تۆمارکردنیان".

ئاماژەی بەوەشكراوه‌ "کۆتا وادە بۆ تۆمارکردنی ئۆتۆمبێلە بێسەرەتاکان 1ی تشرینی یەکەمە و لەپاش ئەو بەروارەوە رێککاری یاسایی بەرامبەر خاوەنی ئۆتۆمبێلە بێسەرەتا تۆمارنەکراوەکان دەگیرێتەبەر".

سه‌ره‌تاى ئه‌مساڵ، ئۆتۆمبێله‌ بێ سه‌ره‌تاكان كه‌ بڕیارى ده‌سته‌به‌سه‌راگرتنیان هه‌بوو له‌ لایه‌ن لیژنه‌ى ئه‌منى سلێمانى، به‌ بڕیارى بافڵ جه‌لال تاڵه‌بانى، سه‌رۆكى یه‌كێتیی نیشتمانیی كوردستان ده‌ستبه‌سه‌رداگرتنیان هه‌ڵوه‌شایه‌وه‌ تا چاره‌سه‌كردنى كێشه‌كه‌.

لاى خۆیه‌وه‌ سواره‌ عومه‌ر، نوێنه‌رى ئۆتۆمبێله‌ بێ سه‌ره‌تاكان به‌ مه‌ودا میدیاى راگه‌یاند "ئه‌و رێكاره‌ بۆ ئۆتۆمبێله‌ بێ سه‌ره‌تاكانى سنورى پارێزگاى هه‌ڵه‌بجه‌یه‌و سلێمانى ناگرێته‌وه‌".

وتیشى "چه‌ندانجار داوامانكردووه‌ چاره‌نوسى ئه‌و ئۆتۆمبێله‌ بێ سه‌ره‌تایانه‌ یه‌كلایی بكرێته‌وه‌ و كۆدێك یان ئاڕمێكیان بۆ بكرێت بۆ ئه‌وه‌ى بتوانن به‌بێ گرفت بسوڕێنه‌وه‌".

ع