مەودا میدیا-

فراكسیۆنی پارتی دیموكراتی كوردستان لە پەرلەمانی كوردستان لە بارەی ساڵیادی بە پارێزگابوونی شاری سلێمانی راگەیەندراوێكی بڵاوكردەوە و دەڵێت، سلێمانی سەر مەشقبوونی بزواتی رۆشنبیرییە و دژایەتی هەر كارێك دەكەین كە خزمەت بە سلێمانی نەكات.

لە راگەیەندراوەكەی ئەو فراكسیۆنە هاتووە " 97 ساڵ تێدەپەڕێت بەسەر بە پارێزگابوونی شاری سلێمانی پایتەختی ڕۆشنبیری، 97 ساڵ پڕ لە خەبات، بەرەنگاری لە ستەم، قوربانیدان و سەرمەشقبوونی بزاوتی ڕۆشنبیری".

هەروەها دەڵێت "سلێمانی دیرۆکێکی پڕ لە شانازی و سەروەری هەیەو شایەنی ئەوەیە باشترین خزمەتبکرێت و نەبێتە قوربانی هیچ کەس و لایەنێک و کار بۆ ئەوە بکرێت دیسان چەشنی جاران شەوق بداتەوە".

ئەوەش خراوەتەڕوو "وەک فراکسیۆنی پارتی پاڵپشتی هەر کارێکی باش دەکەین کە ئامانجەکەی خزمەتی سلێمانییەو دژایەتی پێچەوانەکەی دەکەین".