مەودا میدیا-

ئەمڕۆ دووشەممە، نرخی نەوت لە بازاڕی بۆرسە بەرزبوونەوەی تۆماركرد و چەند رۆژێكە بە رێژەیەكی كەم بەردەوامە لە بەرزبوونەوە.

بەپێی هەواڵێكی ئاژانسە جیهانییەكان، ئەمڕۆ دووشەممە، نرخی یەك بەرمیل نەوتی برێنت بۆ 42 دۆلار  و 10 بەرزبووەتەوە و نەوتی خاوی ئەمریكیش بۆ یەك بەرمیل 39 دۆلار و 90 سەنت مامەڵەی پێوەكراوە.

شارەزایەكی بواری ئابووريش باس لەوە دەكات، بەرزبوونەوەی نرخی نەوت كاریگەری لەسەر داهاتی هەرێمی كوردستان دەبێت و ئەگەر نەوت بەردەوام بێت لە بەرزبونەوە دۆخی ئابووری باشتر دەبێت.

نەوزاد كامیل، شارەزای بواری ئابووری بە مەودا میدیای راگەیاند "بەرزبوونەوەی نرخی نەوت كاریگەری باشی دەبێت لەسەر داهاتی هەرێمی كوردستان و بەهۆیەوە داهات زیاد دەبێت و ئابووری بەرەو باشتر دەڕوات".

ئاماژەی بەوەشكرد "بەردەوامبوونی بەرزبوونەوەی نرخی نەوت، كاریگەریشی دەبێت لەسەر مووچەی فەرمانبەران و ئەگەر بەو شێوەیە نرخەكەی بەرزبێتەوە، حكومەت داهاتی زیاتر لەبەردەست دەبێت بۆ دابەشكردنی مووچەی فەرمانبەران".