مەودا میدیا-

سەرۆک وەزیرانی عیراق درەنگانی شەوی رابردوو گۆڕانكاری لە ژمارەیەك پۆستی باڵادا کرد و سەرۆکی دەستەی دەروازە سنوورییەکان و سەرجەم بەڕێوبەری دەروازە سنورییەکانی لە پۆستەکانیان دوورخستەوە.

درەنگانی شەوی رابردوو مستەفا كازمی، سەرۆک وەزیرانی عیراق فالح فەیازی لە پۆستی سەرۆكی دەزگای ئاسایشی نیشتمانی عیراق لابردووە و خالید عوبەیدی، وەزیری پێشووتری بەرگری عیراقی خستە شوێنی.

 ھەروەھا، سەرۆکی دەستەی دەروازە سنوورییەکان و سەرجەم بەڕێوبەری دەروازە سنورییەکانی لە پۆستەکانیان دوورخستەوە و حەیدەر شەمەری، بە سەرۆكی وەقفی شیعی دانا و نائل سەعدی بە سەرۆكی دەسەڵاتی فرۆكەوانی داناوە، ھەروەھا باسم عەلی كردووەتە سەرۆكی بانكی رەشید.

هاوکات سەرۆک وەزیرانی عیراق ژمارەیەك بەرپرسی نوێی بۆ دەستەی راگەیاندنی عیراق دانا و سەرجەم بەرپرسەکانی دیکەی لابرد لە پۆستەکانیان.