مەودا میدیا-

تەندروستیی گەرمیان رایدەگەیەنێت لە سەرەتای سەرهەڵدانی ڤایرۆسی كۆرۆناوە تاكو 14ی تەموز 85 فەرمانبەر و كارمەندی تەندروستی گەرمیان تووشی ڤایرۆسی كۆرۆنابوون، ئاماژە بەوەشکراوە  ژمارەیەك لەو توشبوانە چاكبوونەتەوە و ژمارەیەكی تریشیان لە قۆناغی چارەسەر و چاكبوونەوەن.

بەڕێوەبەرایەتی گشتی تەندروستیی گەرمیان ئاشکرای کردووە "تاكو بەرواری 14ی تەموز 85 فەرمانبەر و كارمەندی تەندروستیی گەرمیان تووشی ڤایرۆسی كۆرۆنا بوون، دوان لەو تووشبووانەش گیانیان لەدەستداوە".

ئاماژەی بەوەشداوە "بەپێی دواین ئاماری ئامادەكراو (85) فەرمانبەر و كارمەندی تەندروستی گەرمیان تووشی كۆرۆنا بوون، لەو رێژەیە (73) لە رەگەزی نێرن و (12) لە رەگەزی مێ".

ئەوەش خراوەتەڕوو "هەربەپێی ئەو ئامارە (53) تووشبوو كارمەندی تەندروستین بە ناونیشانی جیاوازی پیشەییەوە، هەروەك (17) توشبویان كارمەندی ئیداریین و (9) تووشبوویان كارمەندی خزمەتگوزاریین و (6) توشبوشیان پزیشكن".

لە راگەیەندراوەکەشدا ئەوەش هاتووە "ژمارەیەك لەو تووشبووانە چاكبوونەتەوە و ژمارەیەكی تریشیان لە قۆناغی چارەسەر و چاكبوونەوەن".