ئینستتیوتی نارین، مەودا میدیا- ھێمن سەعید

دۆناڵد ترەمپ، سەرۆكی ویلایەتەیەكگرتووەكانی ئەمەریكا رەتیكردەوە دان بنێت بە هەر ئەنجامێكی هەڵبژاردنەكانی سەرۆكایەتی ئەمەریكا لە تشرینی دووەمی ئەمساڵ ئەگەر ئەنجامەکەی بەدڵی ئەو نەبێت.

دوێنی یەكشەممە لە میانەی چاوپێكەوتنێكی لەگەڵ تەلەفزیۆنی فۆكس نیوزی ئەمەریكی دۆناڵد ترەمپ وتی "من كەسێكی باش نیم بدۆڕێم، حەزم بەدۆڕان نییە، زۆر نادۆڕێم و حەزیشم ناكەم بدۆڕێم".

ترەمپ وتیشی "دەنگدانی ئەلیكترۆنی لە هەڵبژاردنەكان كە دیموكراتەكان پێشنیاریان كردووە بەهۆی بەردەوامی ڤایرۆسی كۆرۆنا دەبێتە هۆی روودانی تەزویر لە هەڵبژاردنەكاندا".

هەروەها لەمیانی پرسیارێكی پێشكەشكارەكەدا كە ئایا ئەگەر بدۆڕێیت دان دەنێیت بە هەڵبژاردنەكاندا ترەمپ رایگەیاند "نەخێر، دەبێت یەكەمجار هەموو شتێك بزانم". هەوەرها پێشكەشكارەكە دووبارە پرسیارەكەی لێكردەوە كە ئایا رازی دەبیت بە ئەنجامی هەڵبژاردنەكە یان رەتیدەكەیتەوە ئەگەر بدۆڕێیت، ترەمپ ئاماژەی بەوەشکرد "نامەوێت بڵێم بەڵێ هەروەك ئەوەی ناشمەوێت بلێم نەخێر".

ترەمپ لە بەشێك لە قسەكانیدا هێرشی كردە سەر جۆ بایدن، پالێوراوی پاڵشتیكراوی دیموكراتەكان و بەوە وەسفیكرد كە شیاوی سەرۆكایەتیكردن نییە و روونیکردەوە "ئەو ناتوانێت دوو كەلیمە پێكەوە بلكێنێت". هەروەها وتی "لەلایەن خەڵكانی دیكەوە ئاراستەدەكرێت".

شایەنی باسە پێشتر ترەمپ لە لێدوانێكیدا رایگەیاند دان دەنێت بە ئەنجامی هەڵبژاردنەكاندا ئەگەر بشدۆڕێت، بەڵام لەم چاوپێكەوتنەی ئەمڕۆی بە پێچەوانەی لێدوانكەی پێشووی رایگەیاند ئەگەر بدۆڕێت ئەنجامی هەڵبژاردنەكە قبوڵ ناكات بە بیانووی گزیكردن.

جێگەی ئاماژەشە بایدن پێشتر رایگەیاندبوو بەهۆی پێشكەوتنی بەرێژەیەكی زۆر لە راپرسیەكاندا لەسەر ئاستی نیشتمانی بەسەر ترەمپدا لەمانگی شەشی رابردوو وای لە ترەمپ كردووە تووشی قەلەقی ببێت و هەوڵبدات بۆ گزیكردن لە هەڵبژاردنەكاندا، بایدن ئاماژەی بەوەشدابوو ترەمپ بروای وایە ئەگەر هەڵبژاردنەكانی دۆڕاند و رەتیكردەوە دانی پێدابنێت سوپا پشتیویانی دەكات.