مەودا میدیا – سەركۆ جەمال

شاندی رێكخراوی "نوا" بۆ هاوكاریی مرۆیی و چاودێریی مافی مرۆڤ، سەردانی بریندارەكانی كونەماسییان كرد، بەڵگەكانی رووداوەكەیان تۆماركردووە و بڕیارە بەرزی بكەنەوە بۆ رێكخراوی مافی مرۆڤی سەر بە نەتەوە یەكگرتووەكان.

ئێوارەی ئەمڕۆ شاندێك لە رێكخراوی نوا بۆ هاوكاریی مرۆیی و چاودێریی مافی مرۆڤ لە هەرێمی كوردستان و عیراق، كە بارەگای سەرەكییان لە سویسرایە، سەردانی گوندی كونەماسییان كرد لە سنووری شارباژێر و بریندارەكانی بۆردوومانەكەی سوپای توركیایان لەو گوندە بەسەر كردەوە، لە كۆتایی سەردانەكەشیاندا لە شوێنی بۆردوومانەكە كۆنگرەیەكی رۆژنامەنوسییان ئەنجامدا.

لەوبارەیەوە شێركۆ حەمەئەمین، نوێنەری رێكخراوەكە رایگەیاند: هاتووین تا لە زمانی خۆیانەوە بارودۆخی بریندارەكان و چۆنییەتی رووداوەكە دۆكیۆمێنت بكەین، چونكە بەڕاستی ئەو شوێنەی كە دەوڵەتی توركیا بۆردوومانی كردووە جێگای گەشتیارییە و هیچ بنكە و بارەگایەكی حزبی و سەربازیی تێدا نییە و قوربانییانیش خەڵكی مەدەنین.

شێركۆ حەمەئەمین ئاماژەی بەوەشدا " ئەم كەیسە دۆكیۆمێنت دەكەین و رادەستی ڕێكخراوی  مافی مرۆڤی سەر بە ئەوروپای دەكەین لە جنێف بۆ جوڵاندنی رای نێودەوڵەتی لەسەر ئەم بابەتە".