مەودا میدیا- سەركۆ جەمال

رووداوێكی هاتوچۆ لەنێوان ئۆتۆمبێلە سەربازیەكانی سوپای ئەمەریكا و روسیا لە رۆژئاوای كوردستان روویدا، بەوهۆیەوە ژمارەیەك سەربازی ئەمەریكی برینداربوون.

دوو بەرپرسی ئەمەریكی بە ئاژانسی رۆیتەرزیان راگەیاندووە " سەربازە ئەمەریكیەكان بە بەریەككەوتنی ئۆتۆمبێلەكانیان برینداربوون و هیچ شەڕە تەقەیەك لەنێوان هێزەكانی ئەمەریكا و روسیا رووینەداوە".

ئەو دوو بەرپرسە كە نەیانویستووە ناویان ئاشكرابكرێت  ئەوەشیان خستووەتەڕوو "رووداوەكە لە باكووری رۆژهەڵاتی سووریا روویداوە و برینی سەربازەكانیان سووكە".

هەرچەندە تائێستا پنتاگۆن هیچ لێدوانێكی لەوبارەیەوە نەداوە، بەڵام پێشتر چەندینجار بینراوە و گرتەی ڤیدیۆیش بڵاوكراوەتەوە، كە تیایدا دەردەكەوێت ئۆتۆمبێلەكانی روسیا و ئەمەریكا لە رۆژئاوای كوردستان  رێگە لە یەكتری دەگرن یاخود رووبەڕووی یەكتر دەبنەوە و یەكتری بێزار دەكەن، بەڵام ئەمە یەكەمجارە بەریەككەوتنی ئۆتۆمبێلەكانیان رووبدات.