مەودا میدیا- سەركۆ جەمال

شاندێكی ئەنجومەنی سوریای دیموكراتی- مەسەدە، كە لە روسیایە، دوای واژۆكردنی رێككەوتنێك لەگەڵ پارتێكی سوریا، لەگەڵ سێرگی لاڤرۆف وەزیری دەرەوەی روسیا كۆبوونەوە.

بەپێی زانیارییەكان شاندەكەی مەسەدە لە بینای وەزارەتی دەرەوەی روسیا لەگەڵ لاڤرۆف كۆبوونەتەوە و باسی چارەسەریی قەیرانی سوریا، كۆبوونەوەكانی كۆمیتەی دەستوری بنەڕەتی سوریا لە جنێڤ و هاوكارییە مرۆییەكانیان كردووە.

شاندەكەی ئەنجومەنی سوریای دیموكراتی- مەسەدە، پێكدێت لە "ئیلهام ئەحمەد سەرۆكی دەستەی بەڕێوبەریی مەسەدە و جێگرەكەی حیكمەت حەبیب، سەنحاریب بارسوم سەرۆكی یەكێتی سوریانەكان و سیهانۆك دیبۆ نوێنەری مەسەدە لە میسر".

جێگای ئاماژەیە، هەر ئەمڕۆ شاندەكەی مەسەدە، كە لەسەر داوای فەرمیی وەزارەتی دەرەوەی روسیا چووبووە مۆسكۆی پایتەخت، رێككەوتنێكی لەگەڵ پارتی ئیرادەی گەل‌‌ واژۆ كردووە.