مەودا میدیا- سەركۆ جەمال

دوای ئەوەی سوپای لوبنان هەواڵی خستنەخوارەوەی فڕۆكەیەكی سیخوڕیی ئیسرائیلی لە باشوری لوبنان بڵاوكردەوە،سوپای ئیسرائیل ئەو هەواڵەی پشتڕاست كردەوە.

دوێنێ سوپای لوبنان بە راگەیەندراوێك ئاشكرایكرد "ئێوارەی رۆژی پێنجشەمە فڕۆكەیەكی بێفڕۆكەوانی ئیسرائیلی كە 200 مەتر هێڵی شینی بەزاندبوو لە سەر شاڕۆچكەی عیتا ئەلشەعب لەلایەن سوپای لوبنانەوە خراوەتە خوارەوە".

دوا بەدوای بڵاوبوونەوەی هەواڵەكە، ئەمڕۆ ئویخای ئدرعی، وتەبێژی سوپای ئیسرائیل لە تۆڕی كۆمەڵاتی تویتەر بەتویتێك خستنەخوارەوەی فڕۆكەیەكی بێفڕۆكەوانی ئیسرائیلی لە سەر سنوورەكانی ئیسرائیل و لوبنان راگەیاند".

وتەبێژی سوپای ئیسرائیل، جەختی كردووەتەوە  " هیچ دڵەڕاوكێیەكیان لەدەست گەیشتن بە زانیارییەكانی نێو ئەو فڕۆكەیە نیە".