مەودا میدیا- سەركۆ جەمال

داواكاری گشتی دیاربەكر داوای لە وەزارەتی دادی توركیا كرد بە فەرمی ئینتەرپوڵ رابسپێرێت بۆ دەستگیركردن و رادەستكردنی عوسمان بایدەمیر و رادەست كردنەوەی بە توركیا.

میدیا فەرمییەكانی توركیا، بڵاویانكردەوە، داواكاری گشتی دیاربەكر بە فەرمی داوای لە وەزارەتی دادی توركیا كردووە پۆلیسی نێودەوڵەتی "ئینتەرپوڵ" رابسپێرێت بۆ ئەوەی‌ عوسمان بایدەمیر سیاسەتمەداری كورد و ئەندامی پێشووی پەرلەمانی توركیا دەستگیربكەن و رادەستی ئەنقەرەی بكەنەوە.

میدیاكانی توركیا ئاماژەیان بەوەشداوە " لەساڵی 2017وە سكاڵا لە دژی بایدەمیر تۆماركراوە بەهۆی وتارێكەوە تۆمەتباركراوە بەوەی دژی سەروەری توركیایە و سووكایەتی بە توركیا كردووە".

دواتر بایدەمیر لە نیسانی 2018دا لە پەرلەمانتاری لابراوە و پاشانیش چووەتە دەرەوەی توركیا و تا ئێستا نەگەڕاوەتەوە بۆ ئەو وڵاتە و لە ئەڵمانیا نیشتەجێیە‌.