مەودا میدیا- سازگار ئەحمەد

وەرگێڕێكی گەنجی كورد بۆ یەكەمجار لەسەر ئاستی هەرێمی كوردستان، رۆمانێك بەشێوازێكی جیاواز و سەرنجڕاكێش چاپ و بڵاودەكاتەوە، كە ئەویش گەرانتیكردنی رۆمانەكەیە بۆ خوێنەرانی.

رۆمانی (ترس لە مەرگ) یەكەمین بەرهەمی نووسەری ئوسترالیایی (ستیڤ تۆڵتز)ە، كە لە ساڵی 2008 بڵاوبووەوە و لەهەمان ساڵدا پاڵێورا بۆ وەرگرتنی خەڵاتی "مان بوكەر" و وەكو یەكێك لە سەركەوتووترین و گەورەترین رۆمانەكانی مێژووی ئەدەبیاتی ئوسترالیا ناوی دەهێنرێت و یەكێكە لە پڕفرۆشترین بەرهەمەكانی نیویۆرك تایمز و ئەمازۆن.

رۆمانی (ترس لە مەرگ) لەلایەن وەرگێڕی كورد "ئارام رەشید" لە زمانی فارسییەوە كراوە بە كوردی و لەسەر ئەركی خۆی لە تاران چاپكراوە و لەلایەن دەزگای رەهەند كاری بڵاوكردنەوەی بۆ كراوە و لەئێستاشدا لە كتێبخانەكاندا بەردەستە بۆ خوێنەران.

ئارام رەشید، وەرگێڕی رۆمانی (ترس لە مەرگ) بە مەودا میدیای راگەیاند "ئەم رۆمانە باس لە قووڵایی بوونی مرۆڤەكان دەكات، درامێكی خێزانییە كە وێنای ترس، چاوەڕوانیی و ژیان بە كۆمیدیایەكی رەش دەكات".

ئەوەشی خستەڕوو "چیرۆكی رۆمانەكە لەسەر زاری هەردوو كەسایەتی سەرەكی (مارتین و جاسپەر دین)ـەوە دەگێڕدرێتەوە، كە تا ڕادەیەك روانگەی خوێنەر بەرانبەر چەمكەكانی (خۆشەویستی، ژیان، خێزان، نەتەوە و باوك و فەرزەندی) و لە هەمووشیان گرنگتر (مەرگ) دەگۆڕێت".

لەبارەی ئەوەی بۆچی وەرگێڕ ئەم كتێبەی بۆ خوێنەرانی گەرانتی كردووە و چۆن بیری لە كارێكی لەو جۆرە كردووەتەوە، ئارام رەشید وتی "زۆرجار لە پاش خوێندنەوەی كتێبێك، ئەو هەستەم هەبووە كە خەڵەتێنراوم، خەڵەتێنراو بەو مانایەی كە پارە و كاتێكی زۆرم داوە لە بەرانبەر شتێكدا كە پێموابووە هەم پارەكەم و هەم كاتەكەم بەهەدەر چووە، ئیدی زۆرجار بیرم لەوە دەكردەوە بریا بمتوانیبا لەگەڵ (نووسەر یان وەرگێڕ)ی كتێبەكە باسی ئەو هەستەی خۆمم بكردایە و داوای روونكردنەوەم بكردبایە".

وتیشی "لەمەوە بیرم لەوە كردەوە خۆم ئەوە كارە بكەم كە تائێستا خەونم بووە هەبێت و نەبووە، من دەتوانم بڕی پارەی كتێبەكە بۆ هەركەسێك بگەڕێنمەوە كە كتێبەكەی بە دڵ نەبێت و هەست بە خەڵەتاندن بكات لە بەرانبەر كڕینیدا، بەڵام بە داخەوە كە ناتوانم قەرەبووی ئەو كاتەی بۆ بكەمەوە كە لەدەستی چووە، تەنیا دەتوانم گوێی بۆ رادێرم كە بۆچوونەكانیم لەسەر كتێبەكە بۆ باس بكات و هۆكارەكانی بەدڵنەبوونی كتێبەكەم بۆ روون بكاتەوە، كە بە داخەوە ئەمەش دیسانەوە پێویستی بە كاتە".

سەبارەت بەوەی بۆچی ناوی كتێبەكەی گۆڕیوە، وەرگێڕی رۆمانەكە ئاماژەی بەوەدا "ناوی كتێبەكە خۆی (بەشێك لە گشت)ـە، بەڵام (ستیڤ تۆڵتز)ی نووسەری كتێبەكە لە چاوێپێكەوتنێكدا دەڵێت، رۆمانی (بەشێك لە گشت)م دەربارەی ترس لە مەرگ نووسیوە، هەروەها دەتوانین بڵێین كۆنسێپتی بنەڕەتی كتێبەكە مەرگە، روونتر بڵێم (ترس لە مەرگ)ە و گەورەترین ترسی ژیانی مارتین دینیش هەر مەرگە، بۆیە لەبری ناونیشانەكەی خۆی ئەم ناونیشانەم بۆ هەڵبژارد".

ئارام رەشید، كتێبەكان لە زمانی فارسییەوە وەردەگێڕێتە سەر زمانی كوردی و تاوەكو ئێستا وەرگێڕانی بۆ هەریەك لە رۆمانەكانی (كۆلارەباز، بەردی سەبووری، منداڵی پێنجەم، رێگا، بازاڕیی، كافكا لە كەنار دەریا) كردووە و چاپ و بڵاویكردوونەتەوە.

س.س