مەودا میدیا-

سه‌رۆكى هه‌رێمى كوردستان رایگەیاند، لە نزیکەوە بەدواداچوون بۆ زیانلێکەوتوانی لافاوەکە دەکەن و لايه‌نه‌ په‌يوه‌نداره‌كانى را‌سپاردووه‌ بۆ هاوكاريكردن و يارمه‌تيدانى لێقه‌ومان و دابينكردنى پێداويستييه‌كانيان.

بە پێی راگەیەندراوێکی نوسینگەی راگەیاندنی سەرۆکایەتیی هەرێمی کوردستان، ئه‌مڕۆ يه‌كشه‌ممه‌ نێچيرڤان بارزانى، سه‌رۆكى هه‌رێمى كوردستان په‌يوه‌ندييه‌كى ته‌له‌فۆنی له‌گه‌ڵ ئومێد خۆشناو، پارێزگارى هه‌ولێردا ئەنجامداوە و به‌دواداچوونى بۆ زيانه‌كانى لافاو له‌ هه‌ولێر و چه‌ند ناوچه‌يه‌كى سنورى پارێزگاكه‌ كردووە.

سه‌رۆكى هه‌رێمى كوردستان رایگەیاندووە، سه‌رۆكايه‌تی هه‌رێمى كوردستان له‌ نزيكه‌وه به‌دواداچوونى مه‌يدانى بۆ شوێنه‌ زيانبه‌ركه‌وتووه‌كانى لافاو ده‌كات و لايه‌نه‌ په‌يوه‌نداره‌كانى را‌سپاردووه‌ بۆ هاوكاريكردن و يارمه‌تيدانى لێقه‌ومان و دابينكردنى پێداويستييه‌كانيان، دەشڵێت "هيچ زيانێكى گيانى له‌ لافاوه‌كان نه‌كه‌وتووه‌ته‌وه‌".

ئەوە لە کاتێکدایە سەر لە ئێوارەی دوێنێ شەپۆلێکی بەهێزی باران بارین و تەرزە هەندێک ناوچەی هەرێمی گرتەوە، ئەمەش بووە هۆی سەرهەڵدانی لافاوێکی گەورە لە بەشێک لە شار و شارۆچکەکان و بەوهۆیەوە پارێزگای هەولێر ئەمڕۆی کردە پشووی فەرمی.

ر. ر