مەودا میدیا-

بەڕێوەبەرایەتیی ھاتوچۆی راپەڕین رایگەیاند، ئەمشەو لەسەر رێگەی سەرەکی رانیە- قەڵادزێ و لە نزیک سێ رێیانی غابات رووداوێکی هاتوچۆ لە جۆری پێکدادان روویدا و لە ئەنجامدا کەسێک گیانیلەدەستدا.

ئەمڕۆ یەکشەممە بەڕێوەبەرایەتیی ھاتوچۆی راپەڕین لە راگەیەنراوێکدا ئاماژەی بەوەکرد"کاتژمێر 6:00ی  ئەمشەو رووداوێکی هـاتوچۆ لە نێوان ئۆتۆمبێلێکی باری مێرسیدس/ئەتیکۆ و ئۆتۆمبێلی تاکسی لانسەر روویداوە، بەداخەوە لە ئەنجامی رووداوەکە شۆفێری لانسەر تاکسییەکە گیانیلەدەستدا".

رووداوەکانی هاتوچۆ بە یەکێک لە سەرەکیترین رووداوەکانی مردن لە هەرێمی کوردستان دادەنرێت و شارەزایانی هاتوچۆش هۆکارەکەی بۆ خراپی رێگەوبانەکان و پابەندنەبونی شۆفێران بە رێنماییەکانی هاتوچۆ دەگەڕێننەوە.

ر. ب