مەودا میدیا-

وەزیری کشتوکاڵ و سەرچاوەکانی ئاوی حکومەتی ھەرێمی کوردستان رایدەگەیەنێت، بڕیاریانداوە بە دابەزاندنی نرخی بنەتۆی گەنم بۆ 530 هەزار دینار بۆ ھەر تۆنێک.

ئەمڕۆ یەکشەممە بێگەرد تاڵەبانی، وەزیری کشتوکاڵ و سەرچاوەکانی ئاوی حکومەتی ھەرێمی کوردستان رایگەیاند "لە پێناو بەرژەوەندی و پاڵپشتی راستەوخۆی جوتیاران و بە مەبەستی دابین کردنی بنەتۆی گەنم لە تەرزی بەبڕشتی خۆماڵی، بڕیاردرا بە دابەزاندنی نرخی بنەتۆ بۆ 530 ھەزار دینار بۆ ھەر تۆنێک، کە بە بەراوردی ئەم نرخە لە بازاڕەکانی جیھان و کوردستان لە سەروی یەک ملیۆن دینارە".

ئاماژەی بۆ ئەوەشکرد "ئەم بڕیارە بە چاودێری وەزارەتی کشتوکاڵ و سەرچاوەکانی ئاو لە چوارچێوەی پرۆژەی بە بازاڕکردنی گەنمی جوتیاران لەلایەن کۆمپانیای جێبەجێکاری قەیوان و خۆشناو جێبەجێ دەکرێت و جوتیاران دەتوانن لە ئێستادا بە نرخی دیاری کراوی سەرەوە ھەرزانتر لە نرخی بازاڕەکان بنەتۆی گەنم بەردەست بکەن، بە کوالێتی بەرز و بەبڕشت و تەرزی خۆماڵی، بەو رێژەیەی کە بەرھەم ھێنراوە لە ساڵی پاردا".

ساڵانە لەم کاتەدا کە وەرزی تۆوکردنی بەربوومی دانەوێڵەیە حکومەتی هەرێمی کوردستان بۆ پاڵپشتی لە بەرهەمی ناوخۆ و جوتیاران بنەتۆ بەنرخێکی کەمتر لە نرخی بازاڕ بە جوتیاران دەدات.

ر. ب