مەودا میدیا-

لە کۆبوونەوەی ئەمڕۆیدا ئەنجومەنی وەزیرانی عیراق بڕی 200 هەزار دۆلاری بۆ وەزارەتی دەرەوە تەرخانكرد بۆ گەڕاندنەوەی ئەو كۆچبەرانەی كە دەیانەوێت لە بیلاڕوسیا و پۆڵەندا بگەڕێنەوە عیراق.

لە رەگەیەندراوێکدا کە نوسینگەی راگەیاندنی مستەفا کازمی، سەرۆكی ئەنجومەنی وەزیرانی عیراق بڵاویكردووەتەوە هاتووە "ئەمڕۆ سێشەممە ئەنجومەنی وەزیرانی عیراق بە سەرۆكایەتیی مستەفا كازمی كۆبووەوە و تاوتوێی دوایین گۆڕانكاریی و پێشهاتە سیاسی و ئەمنییەكانیان كردووە".

ئاماژەی بەوەشکراوە"لە كۆبوونەوەكەدا ئەنجومەنی وەزیران بڕی 200 هەزار دۆلاری بۆ وەزارەتی دەرەوە تەرخانكرد، بۆگەڕاندنەوەی ئەو كۆچبەرانەی كە لە بیلاڕوسیا، لیتوانیا و پۆڵەندان و دەیانەوێت بگەڕێنەوە عراق".

ئەوە لە کاتێکدایە لە ئێستادا بە هەزاران کۆچبەر لەسەر سنورەکانی بیلاڕوسیا رێگەیان لێگیراوە کە سنوری پۆڵەندا ببڕن و لە رێگەی ئەو وڵاتەوە بگەنە وڵاتانی دیکەی ئەوروپا، بە پێی ئەو گرتە ڤیدیۆیانەی بڵاودەکرێتەوە بەشێک لە کۆچبەرەکان کورد و عیراق-ین و دۆخیان خراپە.

ر. ب