مەودا میدیا-

کۆمپانیای تەڵەبات بۆ خزمەتگوزاریی گەیاندنی خواردەمەنی ئەمڕۆ دووشەممە بە روونکردنەوەیەک رەتیکردەوە کە هەرەشەیان لێکرابێت و دەڵێت "هیچ کەسێک کێشەی بۆ دروستنەکردووین". 

کۆمپانیای تەڵەبات لە روونکردنەوەیەکدا کە بۆ بەڕێوەبەرایەتیی ئاسایشی سلێمانی ناردووە ئاماژەی بەوەکردووە "ئەو هەواڵانە رەتدەکەینەوە کە باس لەوەدەکەن ژمارەیەک بەرپرسی ئەمنی و حزبی هاتوونەتە سەر کۆمپانیاکەمان و پێیان راگەیاندوین کە گەر شەریکیمان نەکەن لەو پارەیەی دەستتان دەکەوێت کێشەتان بۆ دروست دەکەین".

باسی لەوەشکردووە "پۆلیس و ئاسایشی سلێمانی زۆر هاوکارمان بوون و بەئەرکی خۆیان هەستاون، بۆیە داوای یاسایی لەسەر ئەو کەسانە تۆماردەکەین کە ئەو هەواڵەیان بڵاوکردووەتەوە".
 
پێشتر لە چەند میدیا و پەڕەیەکی سۆشیال میدیا هەواڵی ئەوە بڵاوکرایەوە کەلەلایەن چەند کەسێکەوە هێرشکراوەتە سەر کۆمپانیای تەڵەبات و ‏هەڕەشەیان لە لقی کۆمپانیای تەڵەبات کردووە، بەوەی "دەبێت داهاتەکەیان لەگەڵدا ‏بەشبکات، بەوەش نرخی گەیاندنی کۆمپانیاکە گرانبووە".

ر. ئ.