کوردستانی
یەکێتی بۆ پارتی: ئەجێندایەكی تەمومژاویتان هەبوو
مەودا میدیا - سلێمانی |
مەودا میدیا-
وته‌بێژى یه‌كێتیی نیشتمانیی كوردستان وه‌ڵامى پارتى ده‌داته‌وه و ده‌ڵێت "پێشوەخت پارتی دوور لە یەكڕیزیی كوردستانی، لەگەڵ چەند لایەنێك رێككەوتنی كردووە، كە خزمەت بە مافە دەستوورییەكان و قەوارەی هەرێمی كوردستان ناکات، دووپاتیشیدەكاتەوە، بەرهەم ساڵح بە رەزامەندی زۆر لایەنی دیکەی عیراقی و کوردستانی بۆ پۆستی سەرۆك كۆماری عیراق دیاریكردووه".
وته‌بێژى یه‌كێتیی نیشتمانیی كوردستان وه‌ڵامى پارتى ده‌داته‌وه و ده‌ڵێت "پێشوەخت پارتی دوور لە یەكڕیزیی كوردستانی، لەگەڵ چەند لایەنێك رێككەوتنی كردووە، كە خزمەت بە مافە دەستوورییەكان و قەوارەی هەرێمی كوردستان ناکات، دووپاتیشیدەكاتەوە، بەرهەم ساڵح بە رەزامەندی زۆر لایەنی دیکەی عیراقی و کوردستانی بۆ پۆستی سەرۆك كۆماری عیراق دیاریكردووه".
ئه‌مین بابه‌شێخ، وته‌بێژى یه‌كێتیی نیشتمانیی كوردستان له راگه‌یه‌ندراوێكدا وەڵامی راگەیەندراوێكی وتەبێژی پارتی دەداتەوە لەبارەی پرسی سەرۆك كۆمار و یەكڕیزیی لایەنە كوردستانییەكان و دەڵێت "لەدوای راگەیاندنی ئەنجامەكانی هەڵبژاردن، هەوڵەكانمان بۆ ئەوە بوو بەیەكڕیزی و پڕۆژەیەكی یەكگرتووی نیشتمانییەوە لەگەڵ لایەنە سیاسیەکانی عیراق بە شیعە و سوننەوە بچینە بەغداد، بەڵام بەداخەوە پێشبینی ئەوە دەكرا پێشوەخت پارتی لەگەڵ چەند لایەنێكی دیکەدا بەبێ ئاگاداریی ئێمە و لایەنەکانی تر چووبوونە ناو رێككەوتنێكەوە، كە بەهیچ شێوەیەك خزمەت بە پرۆسەی سیاسی لە عیراق و مافە دەستوورییەكان و قەوارەی هەرێمی كوردستان ناکات".
جەختیشیکردووەتەوە "وەفدەكانی پارتی بە ناوەڕۆكێكی تەمومژاویەوە دەهاتن بۆ كۆبوونەوەكان، بە بیر پارتیشی دەهێنینەوە كە هیچ رێككەوتنێكی كۆنكرێتیمان لەگەڵیان نەبووە، چونكە خۆیان هەلی وایان نەڕەخساند و دەیانوویست رێككەوتنێكی ناشەفافمان لەگەڵ بكەن".
ئەمین بابە شێخ لەبارەی دووبارە كاندیدكرنەوەی بەرهەم ساڵح بۆ خولی دووەمی سەرۆكایەتی، وتویەتی، "پێداگریمان بۆ ئەوەیە كە ئەو وەك پارێزەری دەستووری عیراقی فیدراڵ و پارێزەری بەرژەوەندییەكانی گەلانی عیراق و قەوارەی هەرێمی كوردستان دەبێت، وەك چۆن هەمیشە نوێنەرانی دیکەی یەكێتیی نیشتمانی لە بەغدا بەپێی دەستوور ئەم ئەركەیان جێبەجێكردووە". دەشڵێت "كاندیدی پەسەندكراوی خۆمان بەڕەزامەندی زۆر لایەنی دیکەی عیراقی و کوردستانی بۆ پۆستی سەرۆك كۆماری عیراق دیاریكردووە".
ده‌قی وەڵامەكەی وتەبێژی یەكێتی بۆ پارتی:
”کۆبوونەوەی ئەنجومەنی سەرکردایەتیی یەکێتیی نیشتمانیی كوردستان كە دوێنێ 23ی کانونی دووەمی 2022، بۆ ڕای گشتی كوردستانیی بڵاویكردەوە، خستنەڕووی ڕاستییەكانی تێدابوو ،چونكە لە دانوستاندنەكاندا هەر لەدوای ڕاگەیاندنی ئەنجامەكانی هەڵبژاردنی تشرینی یەكەمی ساڵی پارەوە هەوڵەكانمان بۆ ئەوە بوو بەیەكڕیزی و پڕۆژەیەكی یەكگرتووی نیشتمانییەوە لەگەڵ لایەنە سیاسییەکانی عێراق بە شیعە و سوننەوە بچینە بەغداد، بەڵام بەداخەوە پێشبینی ئەوە دەكرا پێشوەخت پارتی لەگەڵ چەند لایەنێكی تردا بەبێ ئاگاداریی ئێمە و لایەنەکانی تر چووبوونە ناو ڕێككەوتنێكەوە، كە بەهیچ شێوەیەك خزمەت بە پرۆسەی سیاسی لە عیراق و مافەدەستوریەكان و قەوارەی هەرێمی كوردستان ناکات.
هەر لەسەرەتای ئەو كۆبوونەوانەوە ھەڤاڵ بافڵ جەلال تاڵەبانی و وەفدەكانی یەكێتیی نیشتمانیی کوردستان بە دەسەڵاتی تەواو و بە بڕیاری سەربەخۆی نیشتمانیەوە لەگەڵ پارتی دا گفتوگۆیان دەكرد دوور لە پرەنسیپەکانی تاکڕەوی و قۆرخکاری له پرۆسەی بڕیاردانی سیاسیدا.
بەڵام بەداخەوە ئەوە وەفدەكانی پارتی بوون، کە بە ناوەڕۆكێكی تەمومژاوییەوە دەهاتن بۆ كۆبوونەوەكان.
هەر لێرەدا بە بیر پارتی دیموكراتی كوردستان دەهێنینەوە، كە هیچ ڕێككەوتنێكی كۆنكرێتیمان لەگەڵیان نەبووە، چونكە خۆیان هەلی وایان نەڕەخساند و دەیانوویست ڕێككەوتنێكی ناشەفافمان لەگەڵ بكەن.
بەشدارینەكردنی فراكسیۆنی یەكێتی لەیەكەم دانیشتنی عێراق لەبەر هەڵوێستی پارێزگاری كەركوك بەوەكالەت (ڕاكان جبوری) و كێشەی كەركوك و ناوچە دابڕێنراوەكان بوو و ھیچ پەیوەندیی بەهەڵبژاردنی دەستەی سەرۆكایەتیی پەرلەمانەوە نەبووە.
لەبارەی دووبارە كاندیدكرنەوە ی سەرۆك بەرهەم ساڵح بۆ خولی دووەمی سەرۆكایەتی، پێداگریمان بۆ ئەوەیە كە ئەو وەك پارێزەری دەستووری عێراقی فیدراڵ و پارێزەری بەرژەوەندییەكانی گەلانی عێراق و قەوارەی هەرێمی كوردستان دەبێت، وەك چۆن هەمیشە نوێنەرانی تری یەكێتی نیشتمانی لەبەغداد بەپێی دەستوور ئەم ئەركەیان جێبەجێكردووە.
یەكێتیی نیشتمانیی كوردستان هەمیشە لەگەڵ یەكڕیزی ماڵی كور د بووە و هەوڵی بەردەواممان دووپاتكردووەتەوە بەڵام كە دڵنیابووین پارتی بەئەجێندایەكی تەم و مژاوی هاتە ناو دانوستانەكان و نێو پرۆسەی سیاسی عێراقەوە هەستمان كرد ئەو هەوڵانە مەترسیدار دەبن و خزمەت بەپرۆسەی دیموكراسی و مافە دەستووریەكانی گەلانی عیراق و قەوارەی هەرێم ناكات، بۆیە ئێمەش لەڕوانگەی بڕوای نەگۆڕو چەسپاومان بەڕێكارە دەستووری و دیموكراتییەكان لەپرۆسەی سیاسی عێراق كاندیدی پەسەندكراوی خۆمان و بەرەزامەندی زۆر لایەنی تری عێراقی و کوردستانی بۆ پۆستی سەرۆك كۆماری عێراق دیاریكرد.
لە کۆتاییدا دووپاتیدە کەینەوە، یەکێتیی نیشتمانیی کوردستان بۆ چارەسەرکردنی کێشەکان هەمیشە بڕوای بە پرەنسیبی دیالۆگ و دانوستاندن نەگۆڕە و ئێستاش لە پێناوی بەرژەوەندیی گشتی دەرگای ئەو بژاردەیەمان دانەخستووە، بەمەرجێ بۆ ڕێککەوتنێکی کۆنکرێتی بێت.
ر. ئ.
بیروڕا
