مەودا میدیا-

وتەبێژی وەزارەتی كاروباری شەهیدان و ئەنفالكراوانی حكومەتی هەرێم لەبارەی خەرجكردنی كرێی خوێندنی كەس و كاری شەهیدان رونكردنەوە دەدات و ئەوەش دەڵێت "ژمارەیەكی بەرچاو لە كوڕان و كچانی شەهیدان لە ئێستادا لەسەر ئەركی حكومەتی درێژە بەخوێندن دەدەن و بۆ ئەمساڵیش بەپێی چەند رێككارێك خەرجكردنی پارە بۆ خوێندنی كوڕان و كچانی شەهیدان بەردەوامی دەبێت".

عادل مەلا ساڵح، وتەبێژی وەزارەتی كاروباری شەهیدان و ئەنفالكراوان رایگەیاندووە "خەرجكردنی كرێی خوێندن بۆ كوڕ و كچی سەربەرزی شەهیدان و جینۆسایدكراوان بۆ ئەمساڵیش بەردەوامی دەبێت و بۆ خەرجكردنی پارەكەش چەند مەرجێك دیاریكراون لەوانەش دەبێت قوتابی كوڕ یان كچی شەهید بێت و مەرجەكانی خوێندن لەو زانكۆ یا پەیمانگەیە بیگرێتەوەو دواتر لەلایەن بەڕێوەبەرایەتی سنوری خۆی نووسراوی پشتگیری بۆ دەكرێت و پارەكەی دەكەوێتە سەرحكومەت". 

راشیگەیاندووە "ساڵانی رابردووش وەزارەتی كاروباری شەهیدان  و ئەنفالكراوان بەردەوام بووە لەسەر خەرجكردنی كرێی خوێندن و ژمارەیەكی زۆری كوڕان و كچانی شەھیدان ئێستا لە زانكۆ و پەیمانگەكان لەسەر ئەركی حكومەت درێژە بە خوێندن دەدەن و بۆ ئەمساڵیش ژمارەیەكی دیكە دەچنە پاڵ ئەوانەی ساڵانی رابردوو".

ك. م