مەودا میدیا -

 

ئەندامێکی پێشووی پەرلەمانی کوردستان لەسەر فراکسیۆنی یەکگرتووی ئیسلامی نامەیەکی تووند ئاراستەی سەرۆکی حکومەتی هەرێمی کوردستان دەکات و تێیدا باسی ئێستای شاری هەولێر دەکات کە چەند رێژەی لەشفرۆشی تیایدا زۆر بووە.

 

حاجی کاروان، ئەندامی پێشووی پەرلەمانی کوردستان نامەیەکی تووند ئاراستەی مەسرور بارزانی، سەرۆکی حکومەتی هەرێمی کوردستان کرد و رایگەیاند "سوێند بەخودا، هیچ کاتێک شاری هەولێر بەقەدەر ئێستا لەشفرۆشی تێدا نەبووە، هەرچی لەشفرۆشی باشووری عیراق و ئێرانیشە هاتوونەتە هەولێر".

 

باسی لەوەشکردووە "خۆزگە جەنابتان سنوورێکتان بۆ ئەم بەرەڵایەتییە دابنایە و پاکی و جوانی هەولێر و کوردستان لەمە زیاتر پیس وناشرین نەبێت بە خەڵکانێکی داوێن پیس".

 

ئەوەشی خستووەتەڕوو "هیچ لەشفرۆشێک بەبێ مۆڵەتی فەرمی و بە پاڵپشتیی دەستڕۆشتووەکان نەبێت، ناتوانێت بە ئارەزووی خۆیان کاربکەن و نیشتەجێ ببن، بۆ پشتڕاستیی ئەم قسانە، بانگی دەزگا ئەمنییەکان بکە و خۆت سەرپەرشتیی بۆ بکە".

 

حاجی کاروان وتوشیەتی "دڵنیام هیچ کوردێکی بە ئەمەک و بە رەوشت و دیندار ئەمەی قبووڵ نییە و دڵنیام بەڕێزتان دەتوانن رێگە لەم بەڕەڵایەتییە بگرن و کوردستان بپارێزن، لەو باوەڕەدام قسەی زۆربەی خەڵی کوردستانم کردووە ".

ر.ع