مەودا میدیا - رۆژ عەدنان 

 

وتەبێژی هاتوچۆی هەولێر رایدەگەیەنێت ئەمڕۆ لەنزیک تونێلی ماوەران ئۆتۆمبێلێکی جۆری کیا موهاڤی بەهۆی تیژڕەوییەوە کۆنتڕۆڵی ئۆتۆمبێلەکەی لەدەستداوە و کەوتووەتە نێو دۆڵێکەوە و دەستبەجێ شۆفێرەکەی گیانی لەدەستدا.

 

ئەمڕۆ پێنجشەممە 27ی تەموزی 2023 فازڵ حاجی وتەبێژی هاتوچۆی هەولێر بە مەودا میدیای راگەیاند "نیوەڕۆی ئەمڕۆ و لەسەر رێگای نێوان میراوە – تونێلی ماوەران لە سنووری قەزای شەقڵاوە ئۆتۆمبێلێکی جۆری کیا موهاڤی کۆنتڕۆڵی ئۆتۆمبێلەکەی خۆی لەدەستداوە و لە رێگەکە دەرچووە، دواتر بەرەو هەڵدێرێک رۆیشتووە و چەند تەقلەیەکی لێداوە و لەکۆتایی دۆڵەکە ئۆتۆمبێلەکە وەستاوەتەوە".

 

ئەوەشی خستووەتەڕوو "ئۆتۆمبێلەکە زیانێکی زۆری پێگەیشتووە و سەرەنجامیش بەهۆی ئەو رووداوەوە شۆفێری ئۆتۆمبێلەکە گیانی لەدەستداوە".

 

ئەمەش لەکاتێکدایە، رووداوەکانی هاتوچۆ روولەزیادبوونە و ئامارەکانی گیانلەدەستدان و برینداربوون تادێت زیاد دەکەن بەجۆرێک تەنها لە حەوت رۆژی رابردوودا نزیکەی 40 کەس بەوهۆیەوە بووەتە قوربانی.