مەودا میدیا-

دادگای فیدراڵیی عیراق سكاڵایەكی رەتكردەوە دژ بە سەرۆكی حكومەتی هەرێم كە تێیدا داواكرابوو مووچە پاشەكەوتكراوەكانی مووچەخۆران و خانەنشینان بدرێتەوە.

ئەمڕۆ چوارشەممە 2ی ئاب- 2023 دادگای فیدراڵی عیراق سكاڵایەكی رەتكردەوە كە تێیدا داواكرابوو بڕیاری ژمارە 61ی رێكەوتی 21ی حوزەیرانی 2020 ی ئەنجوومەنی وەزیرانی حكومەتی هەرێمی كوردستان، پووچەڵ و رەتبكرێتەوە.

ئەو بڕیارەی سكاڵاكەی لەدژ كرابوو بریتی بوو لە "لێبڕینی رێژەی لەسەدا 21ی مووچەی فەرمانبەران و خانەنشینانی سەر بە وەزارەت و دەستە و دامەزراوەكانی سەر بە حكومەتی هەرێم".

تێیدا داواشكرابوو ئەو بڕیارە بكشێندرێتەوە و دەستبگیردرێت بەسەر ئەو بڕەپارەیەی لە فەرمانبەران و خانەنشینان بڕدراوە و بگێڕدرێتەوە بۆیان.

دادگای فیدراڵیی عیراق سەبارەت بەو سكاڵایە، دۆسییەکەی بە رەتکردنەوەی داواکارییەکەی سکاڵاکاران بەكۆتاهێنا بەهۆی ئەوەی لە رووی شێوەییەوە (شكلی) ئەو سكاڵایە تایبتەمەندیی دادگاكە نەبووە كە سكاڵاكەی پێ بەرزكراوەتەوە.

ژ.ع