مەودا میدیا-

وەزارەتی بەرگریی توركیا رایدەگەیەنێت لە سنوورەكانی هەرێمی كوردستان پێنج سەربازی كوژراو و بریندار بوون.

لە راگەیەندراوەكەی بەرگریی توركیا ئەمڕۆ چوارشەممە 9ی ئاب-2023 بڵاویكردووەتەوە و تێیدا هاتووە "تەنها لەمڕۆدا دوو سەربازی هێزەكانیان كوژراون".

لەو بڵاوكراوەیەدا یاشار گیولێر، وەزیری بەرگریی توركیا سەرەخۆشیی خۆی راگەیاندووە و ئاماژە بەوەشكراوە، هەر لە سنوورەكانی هەرێمی كوردستان و لەمیانی هێرشەكانیان لە ناوچەكەدا، سێ سەربازی دیكەیان برینداربووە.

ئەوەش لەكاتێكدایە ئەمڕۆ چوارشەممە فڕۆكەیەكی بێفڕۆكەوانی توركیا بۆردومانی ئۆتۆمبێلێكی لە رێگەی دوكان كرد و سەرەنجام دوو هاوڵاتی گیانیان سپارد و یەكێكی دیكەش برینداربوو.

هەر لەماوەی هەفتەی رابردوودا فڕۆكەیەكی بێفڕۆكەوانی توركیا ئۆتۆمبێلێكی لە سنووری چەمچەماڵ بۆردومانكرد و زیانی گیانی و مادی لێكەوتەوە، ئەوەش وێڕای بۆردومانكردنی ناوچە سنوورییەكانی هەرێم لەلایەن فڕۆكە جەنگییەكانی توركیا بە شێوەیەكی بەردەوام.

ژ.ع