مەودا میدیا-

بەڕێوەبەرایەتیی هاتوچۆی هه‌ولێر سەبارەت بە ئۆتۆمبێلی مەلیكە "كراون" روونكردنەوە دەدات و رایده‌گه‌یه‌نێت "تا ئێستا‌ هیچ بڕیارێك لەبارەی ئۆتۆمبێلە بێ‌ سەرەتاكان (مەلیكە) نەدراوە".

فازڵ حاجی، به‌رپرسی راگه‌یاندنی هاتوچۆی هه‌ولێر ئەمڕۆ چوارشەممە 16ی ئاب-2023 لەبارەی تۆماركردنی (ئۆتۆمبێلی مه‌لیكه) رایگەیاند، ئه‌وه‌ی له‌ رابردوودا روویدا بۆ ئۆتۆمبێلی تۆیۆتا كراون (مه‌لیكه‌) ته‌نیا پشكنینی رۆتینی بووە و به‌هیچ شێوه‌یه‌ك هیچیان بۆ ناكرێت و ره‌قه‌میش ناكرێن.

ئاماژەی بەوەشكرد، ئێستا‌ زیاتر له‌ شه‌ش مانگ به‌سه‌ر ئه‌و پشكنینه‌ی رۆیشتووه‌ و هیچیش نه‌كراوه‌، باوه‌ڕناكه‌م له‌ داهاتووشدا هیچیان بۆ بكرێت.

ماوه‌ی رابردوو بڕیارێك ده‌رچوو بۆ تۆماركردنی ئۆتۆمبێلی مه‌لیكه‌ و ئەنجامدانی پشكنین بۆیان، بەوهۆیەوە نرخی ئه‌و جۆره‌ ئۆتۆمبێله‌ به‌ ته‌واوی به‌رز بووه‌وه‌،

ئێستاش بەهۆی ئەوەی هیچ هەنگاوێكی كرداریی نییە بۆ تۆماركردنیان، نرخی ئۆتۆمبێلەكە بەتەواوی شكاوە.

ژ.ع