مەودا میدیا-

مانگی سووری نێودەوڵەتی لە غەزە رایدەگەیەنێت، سوپای ئیسرائیل داوا لە بەرپرسانی نەخۆشخانەی قودس دەكات چۆڵبكرێت.

ئەمشەو 20ی تشرینی یەكەمی 2023، رێكخراوی مانگی سوور لە فەڵەستین رایگەیاند، سوپای ئیسرائیل دوو جار پەیوەندی كردووە بە بەرپرسانی نەخۆشخانەی قودس لە غەزە و داوای لێكردوون چۆڵی بكەن، داواشی لە كۆمەڵگەی نێودەوڵەتی كردووە دەستوەربدەن لە هەڕەشەكانی ئیسرائیل.

لەلایەكی دیكەوە، بەشار موراد بەڕێوەبەری نەخۆشخانەی قودس بۆ ئاژانسی هەواڵیی جەزیرە سەبارەت بەو هەواڵە وتی "پەیوەندیمان پێوەكراوە بۆ چۆڵكردنی نەخۆشخانەكە و پێیان راگەیاندووین چالاكیی سەربازیی ئەنجامدەدرێت".

ئاماژەی بەوەشكرد، چۆڵكردنی نەخۆشخانەكە كارێكی ئاسان نییە، زیاتر لە 12 هەزار ئاوارەی بۆردوومانەكانی غەزەی تێدایە بێجگە لەوەی زیاتر لە 400 نەخۆش لە ناویدا خەوێندراون".

باسی لەوەشكرد، لەسەدا 70ی ئاوارە و نەخۆشەكان منداڵ و ژنن، داواشیان لێكراوە سەرجەمیان بەرەو باشووری غەزە بڕۆن كە 20 كیلۆمەتر لە نەخۆشخانەكەوە دوورە.

هەتا ئێستاش لایەنی پەیوەندیدار لە ئیسرائیل لەوبارەیەوە هیچ راگەیەندراوێكی فەرمیی بڵاونەكردووەتەوە. 

ژ.ع