ئۆپەراسیۆنە یەک لەدوای یەکانی سوپای تورکیا لەناو خاکی هەرێمی کوردستان لەماوەی چەند ساڵی رابردوو تا دواترینیان کە لە رۆژی ١٥ی تەمووزی ٢٠٢٤ دەستیپێکرد، جگە لە داگیرکردنی خاکی زیاتر و ئەنجامدانی چەندین جۆری جینۆساید تیایدا، هاوکات جۆرێکە لە لەسەرخۆ شکاندنی شکۆی نەتەوەیی، زۆرینەیش لێی بێدەنگن.

تورکیا و ئێران و عیراق و سوریا، هەرکامیان بن، دەزانن بەشێکی خاکی کوردستانیان لەلایەن زلهێزەکانەوە دراوەتێ، لەبەرئەوەی کورد هێزی لێوەرگرتنەوەیانی نەبووە لەماوەی سەد ساڵی رابردوو، بۆیە کاروانی خەباتی بەردەوام بووە، جەنگاوە و خۆی رادەستنەکردووە، تۆ واز لەوە بێنە لەهەر سەردەمێکدا خۆفرۆش هەبووە و هەشە، بەڵام هەمیشە کاروانی خەبات و چیاکانی کوردستان ئاوەدان بوونە و بڵێشەی شۆڕش زیاتر تاوی سەندووە.

شکۆی نەتەوە راستەوخۆ خۆی لە خاک، ئاڵا، زمان، کولتوور و ناسنامەدا دەبینێتەوە، هەرکام لەوانە کەوتە بەر شاڵاوی داگیرکەر و نەتەوەکەش توانای پاراستنی نەبوو، ئەوە یانی دەشکێت و ئیتر بەهای یەکسانی سفر دەکرێتەوە.

نەتەوەی شکۆدار رێگەنادات ئاسان ئاسان پێ بنێنە سەر شکۆی، بەڵکو دەجەنگێ و دەیپارێزێت، دەمرێ بۆ ئەوەی ئاڵاکەی بەشەکاوەیی بمێنێتەوە، ریزی پەرتبووی رێکدەخاتەوە و بەمەحاڵدا هەڵدەزنێ، رەوڕەوی خەباتی درێژەپێدەدات بۆ ئەوەی سەروەریی و سەربەرزیی خۆی لەدەستنەدات.

کورد مێژوویەکی لە بەرخودان هەیە، بەڵام بەردەوام پەرتبوو و نەسازاو بووە و لە شوێنێک بەشێکی یان هێزێکی سەرکەوتوو بێت، ئەوا هەوڵدراوە لەڕێگەی ناکۆکی ناوخۆیی یان پیلانی دەرەکییەوە کۆتایی پێبهێندرێت، لەگەڵ ئەوەشدا هێشتا سوودی لەو مێژووە شکستهێنەرە وەرنەگرتووە و بەئێستایشەوە لەبەردەم مەترسیی گەورەدایە.

تورکیا چەندینی شوێنی گرنگی لە سنووری دهۆک داگیکردووە، پەکەکەی گەمارۆ داوە و دەیەوێت لە چالاکییان بخات، زانیارییەکان ئەوە دەخەنەڕوو، سوپای تورکیا لە چەندین شوێنی سنووری ئامێدی تەنانەت بازگەیشی داناوە، سەدان گوند چۆڵکراون و ژیانی خەڵکەکەی کەوتوونەتە مەترسییەوە، کەچی هێشتا حکومەتی هەرێمی کوردستان هەڵوێستێکی رەسمیی دژی تورکیا رانەگەیاندووە و هەر سەرکۆنەی پەکەکە دەکەن.

شکۆی کوردستان بە بەرنامە دەشکێندرێ، یەکدەنگی نەتەوەیی و گوتاری سیاسیی هاوبەشی نیشتمانی بۆ ئێستا لە هەمووکات زیاتر گرنگە و نابێ لەوە زیاتر درەنگ بکەوین و کەمتەرخەم بین، مێژوو بەزەیی بەکەسدا نایەتەوە.

خ.غ