پیسبوونی رووناکی (Light pollution)، بریتییە لە زیادەڕۆیی و بەکارهێنانی هەڵەی رووناکیی دەستکرد، کە کاریگەریی نەرێنیلەسەر ژینگە، تەندروستیی مرۆڤ، رووەک، ئاژەڵان و ئەستێرەناسی هەیە. 

رووناکیی دەستکرد، ئاسان و هەرزان بووە و بۆ ژیانی رۆژانە بووەتە پێویستییەکی سەرەکی، بەڵام کاریگەریی نەرێنی دروست دەکات، بۆیە پێویستی بە شارەزایی و پلاندانان و کەمکردنەوە و سنووردارکردنە. دەتوانرێت بە پلان رووناکییە زیادەڕۆ بێزارکەرەکان کەم بکرێنەوە و هەوڵ بدرێت لە هەر شوێنێک پێویست نەبێت، بەکار نەهێنرێت.

رووناکیی دەستکرد، نەک تەنیا هەر خۆی پیسکەرەوەی رووناکیی دروست دەکات، بەڵکوو پێویستی بە وزەی زۆریش هەیە کە دەبێتە هۆی بەکارهێنانی سەرچاوەکانی وزەی کارەبا کە ئەویش هۆکارێکی تری پیسکەرەوەیە. 

بەپێی زانیارییەکانی کۆمەڵەی ئەندازیارانی رووناکیی ئەمەریکی،ئاستی رووناکیی بەهێزی ناوماڵ لە کاتی شەواندا، دەگاتە پێنج لۆکس، کە ئەمەش ناپەسەندە ئەگەر بەراوردی بکەین بە چڕیی رووناکیی مانگ کە نیو لۆکسە و هەر رووناکییەکیش بە چڕیی پێنج لۆکس لە دەرەوە بچێتە ناو ژووری نووستن، بە پیسبوونی ژینگە ئەژمارە دەکرێت.

سەرچاوەکانی پیسبوونی ڕووناکی
یەکەم: رووناکییە شارستانییەکان: تۆڕە گشتییەکانی رووناکیی شەقام و گۆڕەپانەکان، رووناکیی بینا و دامەزراوە گشتی و تایبەتەکان، تابلۆ و ریکلامە گەورەکان...
دووەم: پیشەسازی و بازرگانی: کارگە و شوێنە پیشەسازییەکان،ناوەندە بازرگانی و گەورەکان، کەرتی گواستنەوە و هاتوچۆ..
سێیەم: رووناکیی تاکەکەسی: ماڵەکان، باخچە و گەڕەکەکان،رووناکیی دەرەوەی بیناکان...

کاریگەرییە ژینگەییەکان
یەکەم: کاریگەری لەسەر ئاژەڵ: تێکدانی پرۆسەی خەوتن و چالاکیی ئاژەڵان، سەرلێشێواندنی ئەو ئاژەڵانەی بە شەو چالاکن، کاریگەری لەسەر پڕۆسەی وەچەخستنەوە...
دووەم: کاریگەری لەسەر رووەک: گۆڕینی پرۆسەی گەشەکردن و گواستنەوەی خۆراک، کورتکردنەوەی ماوەی گەشەکردن، کاریگەری لەسەر وەرزی گوڵدان... 
سێیەم: کاریگەری لەسەر مرۆڤ: تێکدانی ریتمی خەو، زیادبوونی مەترسیی نەخۆشییە دەروونییەکان، کاریگەری لەسەر سیستمی هۆرمۆنی لەش...

هەروەها کاریگەریی دەکاتە سەر بوار زانستی ئەستێرەناسی، ئەویش بە زەحمەتکردنی چاودێریی دیاردە ئاسمانییەکان و کەمکردنەوەی بینینی ئاسمانی شەوانە.

رێگەکانی کەمکردنەوەی پیسبوونی رووناکی
یەکەم: بەڕێوەبردنی گونجاوانەی رووناکی: دانانی کاتژمێر بۆ کوژاندنەوەی رووناکی، بەکارهێنانی رووناکی تەنیا لە شوێنی پێویست، دروستکردنی رووناکیی ئاراستەکراو...
دووەم: بەکارهێنانی تەکنەلۆژیای نوێ: بەکارهێنانی گڵۆپی LED بە رەنگی گونجاو، دانانی ئامێری کۆنترۆڵکردنی خۆکار، بەکارهێنانی رووناکیی کەم و گونجاو...
سێیەم: دانانی یاسا و رێنمایی: دانانی سنوور بۆ رووناکیی گشتی، سەپاندنی شێوازی تایبەت بۆ رووناکی، هۆشیارکردنەوەی کۆمەڵگە...

پیسبوونی رووناکی زۆر تازەیە و لە هەشتاکانی سەدەی بیستەمەوە دەرکەوتووە، بەڵام گرفتێکی جددیی ژینگەیی و زانستییە،سنووردارکردنی پێویستی بە هەوڵی بەردەوام و هۆشیارانەی کۆمەڵگە هەیە.