سەرەڕای هەوڵەكان بۆ راگەیاندنی ئاشتی یەكجاری لەگەڵ پارتی كرێكارانی كوردستان، بەڵام توركیا بەردەوامە لە تۆپبارانكردنی ناوچە سنورییەكانی هەرێمی كوردستان. 
 
كامەران عوسمان، سەرۆكی تیمی كوردستانی_عیراقی رێكخراوی (سی پی تی) ئەمەریكی رایگەیاند"لە رۆژی ٢٤ی ئایارەوە سوپای توركیا لە رێگەی تۆپخانەكانیەوە ٨٣ جار هێرشی كردۆتە سەر چیای نزاركێ، لە سنوری ناحیەی شیلادزێ لە قەزای ئامێدی و تەواوی هێرشەكانیش هەموو رۆژێك بۆ سەر یەك شوێنی دیاریكراوبوون". 

وتیشی"بە تەنیا لە ماوەی یەك هەفتەی رابردوودا، سوپای توركیا ٤٥ جار تۆپبارانی گوندەكانی بەری گارێ-ی لە سنوری ناحیەی دێرەلوك لە قەزای ئامێدی كردووە،بەوەش لە ماوەی یەك هەفتەی رابردوودا، هێرشەكانی سوپای توركیا بۆ سەر هەرێمی كوردستان گەیشتۆتە ١٢٨هێرش و هەمووشیان تۆپباران بوون".

ئاماژەی بۆ ئەوەشكرد"هیچ هاووڵاتییەكی مەدەنی نەبووەتە قوربانی، بەڵام بەردەوامی تۆپباران و هێرشەكان بوونەتە مایەی ترس و دڵەڕاوكێ بۆ دانیشتووانی سنوری قەزای ئامێدی".

كامەران عوسمان پارچە ڤیدیۆیەكی بڵاوكردووەتەوە و ئاماژەی بۆ ئەوە كردووە كە ئەوە  تۆپبارانی ئەمڕۆی سوپای توركیایە بۆ سەر چیای نزاركێ لە سنوری قەزای ئامێدی.
ئ پ