مەودا میدیا-

بەڕێوەبەرایەتیی ئاسایشی رۆژئاوای سلێمانی تیرۆریستێک دەستگیردەکات کە بەشداربووە لەچەندین کاری تاوانکاریدا و ویستوویەتی هەڵبێت بۆ دەرەوەی وڵات.

ئەمڕۆ چوارشەممە 25ی کانونی دووەمی 2023 بەڕێوەبەرایەتیی ئاسایشی رۆژئاوای سلێمانی رایگەیاند "پاڵپشت بە بڕیاری دەزگای ئاسایشی هەرێمی کوردستان، رەزامەندی دادوەر لەسەر بنەمای زانیاری هەواڵگری و بەدواداچوون هێزەکانمان بە هاوکاری  ئۆپەراسیۆنی ئاسایشی سلێمانی، تیرۆریستێک دەستگیردەکات کە بەشداربووە لە ئەنجامدانی چەندین کردەوەی دژ بە مرۆڤایەتی".

ئاماژە بەوەکراوە "تیرۆریستی دەستگیرکراو  (ع ، ق ، م) لە ساڵی (2014) پەیوەندی بە تیرۆریستانی داعشەوە دەکات و بەیعەت بە تیرۆریستی کوژراو (مصعب مەحمود عبدولعەزیز) دەدات و بەشداری شەڕەکانی ناحیەی ئامرلی و سلێمانبەگی کردووە، هەروەها لە ساڵی (2015) چووەتە سنووری قەزای حەویجە و بەشداری چەندین کردەوەی تیرۆریستی کردووە و چەند جارێکیش بە سەختی برینداربووە".

ئاسایشی سلێمانی ئەوەشی خستووەتەڕوو "لە ساڵی 2018 گواستراوەتەوە سنووری قۆری چای لەنێوان (دوزخورماتوو - کفری) وەک چەکداری شەڕکەر هێڵراوەتەوە و شەوی   (18 / 19 ی  1ی  2023) هاتووەتە سنووری بەڕێوەبەرایەتیمان بە مەبەستی هەڵهاتنی بۆ  دەرەوەی هەرێم، بەڵام هەمان شەو لەسەر بنەمای بەدواداچوون دەستگیرکرا و رووبەڕووی یاسا کرایەوە ".

س،ر