مەودا میدیا-

 

سبەی لەشاری سلێمانی یەکێتی و پارتی کۆدەبنەوە و گفتگۆ لەسەر کێشەکانیان دەکەن، بەرپرسانی باڵای هەردوو حزب باسلە کەشێکی باش دەکەن بۆ ئەنجامی کۆبوونەوە و گەیشتن بە چارەسەر.

 
بڕیار وایە سبەی شەممە شاندێکی مەکتەبی سیاسی یەکێتی لە گەڵ شاندی مەکتەبی سیاسی پارتی لە سلێمانی و بینای مەکتەبی سیاسی یەکێتی، کاتژمێر 11 کۆببنەوە.

کۆبوونەوەکە بۆ تاوتوێکردنی چەند پرسێکە کە دیارتریییان پرسی هەڵبژاردن، حکومەتی هەرێم،  گەڕانەوەی یەکێتی بۆ کۆبوونەوەکانی ئەنجوومەنی وەزیران، پرسی داهات و خەرجییەکان، یەکخستنی هەڵوێستەکان بەرامبەر بە بەغدا و دەرەوە، لەگەڵ تاوتوێکردنی ئەو پرسانەی برێت مەکگۆرک بە هەردوولای راگەیاندووە.

لەماوەی چەند رۆژی رابردووشدا سیروان جەمال تاهیر وتەبێژی یەکێتی نیشتمانی کوردستان رایگەیاند، کێشەکانیان لەگەڵ پارتی لەسەر مێزی گفتگۆ چارەسەر دەکەن و راشیگەیاند، گەیشتن بە رێککەوتن و کۆتاییهاتنی گرفتەکان کاری لەپێشینەمان دەبێت.

ماوەیەک ناکۆکییەکانی یەکێتی و پارتی بەردەوامی هەیە بەجۆرێک رەنگدانەوەی لەناو کاروباری حکومەتدا بووە، لەئێستادا هەردوو حزب دەیانەوێت کۆببنەوە و لە سەر مێزی گفتگۆ کێشەکانیان چارەسەر بکەن.

 

ژ.م