مەودا میدیا - 

بافڵ جەلال تاڵەبانی، سەرۆکی یەکێتیی نیشتمانیی کوردستان رایدەگەیەنێت زەمینەیەکی لەبار بۆ گەیشتن بە سازان و رێککەوتنی نیشتمانی هاتووەتە ئاراوە و هیوادارم بەزووترین کات رێککەوتن لەسەر هەڵبژاردن بکرێت.

ئەمڕۆ 21ی ئایاری 2023 بافڵ جەلال تاڵەبانی، سەرۆکی یەکێتیی نیشتمانیی کوردستان پێشوازی لە فۆتوشی ماتسۆمۆتو، باڵیۆزی ژاپۆن لە عیراق کرد و رایگەیاند "زەمینەیەکی لەبار بۆ گەیشتن بە سازان و رێککەوتنی نیشتمانی هاتووەتە ئاراوە و هەموو هەوڵێکیشمان لەپێناو گەیشتن بە ئەنجامێکی ئەرێنی و خزمەتکردنی زیاتری هاوڵاتییاندایە".

باسی لەوەشکردووە "گفتوگۆکان لەبارەی بەڕێوەچوونی هەڵبژاردن لەهەرێم بەردەوامە و هیوادارین ئەو خاڵانەی ناکۆکی لەسەرە، بەزووترین کات رێککەوتنی لەسەر بکرێت و هەڵبژاردنێکی بێگەرد لە وادەی خۆیدا بەڕێوەبچێت".

لە راگەیەندراوەکەدا ئەوەش هاتووە "لەدیدارەکەدا دوایین پێشهات و گۆڕانکارییە سیاسییەکانی هەرێم و عیراق گفتوگۆی لەبارەوەکرا و جەخت لە لێکتێگەیشتن و دیالۆگی بەردەوامی نێوان لایەنەکان کرایەوە بەئامانجی چارەسەرکردنی کێشەکان و زاڵبوون بەسەر ئاڵنگارییەکاندا".

هەر لە دیدارەکەدا بەهێزترکردنی ژێرخانی ئابووریی هەرێم و پەرەپێدانی پەیوەندییە ئابووریی و سیاسییەکانی نێوان هەردوولا تاوتوێکراون.

ر.ع