مەودا میدیا-

وەزیری دارایی و ئابووریی حکومەتی هەرێمی کوردستان رایدەگەیەنێت گۆڕانکارییەکانی بودجە پێچەوانەی رێککەوتنی نێوان هەرێمی کوردستان و عیراقە، ئاماژە بەوەشدەکات هەرێمی کوردستان پابەندی سەرجەم رێککەوتنەکان بووە.

ئاوات شێخ جەناب، وەزیری دارایی و ئابووریی حکومەتی هەرێمی کوردستان لە کۆنگرەیەکی رۆژنامەوانیدا رایگەیاند "نزیکەی 10 ساڵە ئاگاداری وردەکارییەکانی نێوان هەرێمی کوردستان و عیراقین".

ئاماژەی بەوەشکرد "رێککەوتن لەگەل عیراق ئەنجامی دانوستانێکی دوور و درێژ بوو، کوردستان بەڕێککەوتنی پێشوەختە بەشداری لە کابینەی سودانی کرد، بەپێی بەرنامەی کاری حکومەتی سودانی جەخت لە هەماهەنگی کراوە".

وتیشی "هەرچی چاکسازی و دەستکارییەک لە بودجەدا کرابێت بەبێ ئاگاداری ئێمە لەلایەن لیژنەی دارایی پەرلەمانی عیراقەوە نادەستوورییە، هەرێمی کوردستان پابەندی سەرجەم رێککەوتنەکان بووە".

وەزیری دارایی هەرێم دەشڵێت "گۆڕانکارییەکانی بودجە پێچەوانەی رێککەوتنی نێوان هەرێمی کوردستان و عیراقە".

س.ر