مەودا میدیا-

بەڕێوەبەرایەتیی پۆلیسی پارێزگای سلێمانی دەستگیرکردنی سێ تۆمەتباری راگەیاند بە تۆمەتی دروستکردنی بریکارنامەی ساختە بۆ خاوەنیکردنی ئۆتۆمبێلێک.

لە راگەیەندراوێکدا بەڕێوەبەرایەتیی پۆلیسی سلێمانی رایگەیاند "دوای‌ ئه‌وه‌ی‌ زانیاری‌ گه‌یشته‌ هێزه‌كانی‌ پۆلیس كه‌ تۆمه‌تبارێك به‌ بریكارنامه‌ی‌ ساخته‌ و به‌بێ ئاگاداری‌ خاوه‌نه‌كه‌ی‌ به‌نیازه‌ خاوه‌ندارێتی‌ ئوتۆمبێلێكی‌ بارهه‌ڵگر بگوازێته‌وه‌ سه‌ر كه‌سێكی‌ دیکە مه‌فره‌زه‌كانی‌ نووسینگه‌ی‌ نه‌هێشتنی‌ تاوانی‌ به‌كره‌جۆ لێكۆڵینه‌وه‌كانیان ده‌ستپێكرد و توانرا له‌ناو بینای‌ دادنووسی‌ به‌كره‌جۆ تۆمه‌تبار ده‌ستگیربكرێت".

ئاماژە بەوەکراوە "له‌ به‌رده‌وامیی لێكۆڵینه‌وه‌كانی‌ پۆلیسدا ده‌ركه‌وت كه‌ دوو تۆمه‌تباری‌ تر هاوكاری‌ تۆمه‌تباری‌ یه‌كه‌م بوون‌ و توانرا دوو تۆمه‌تباره‌كه‌ی‌ دیکەش ده‌ستگیربكرێن، له‌كاتی‌ ده‌ستگیركردنی‌ تۆمه‌تباره‌كاندا ده‌ستیشگیرا به‌سه‌ر بارهه‌ڵگره‌كه‌دا".

پۆلیسی سلێمانی دەشڵێت "له‌ئێستادا هه‌رسێ تۆمه‌تبار (غ، خ، ع - س، غ، خ - ع، س، ع) كه‌ به‌ رەگه‌ز عه‌رەبن به‌بڕیاری‌ دادوه‌ر و به‌پێی‌ ماده‌کانی‌ 289-298 له‌ یاسای‌ سزادانی‌ عیراقی‌ راگیراون‌ و لێكۆڵینه‌وه‌كان به‌رده‌وامه‌".

س.ر