مەودا میدیا -

 

وەزارەتی کار و کاروباری کۆمەڵایەتیی کۆمەڵێک هەلی کار بۆ خانەکانی منداڵانی بێسەرپەرشت و پیر و پەککەوتەکان رادەگەیەنێت کە دەرفەتێکە بۆ دەرچووانی دانەمەزراو تا بەشێوازی گرێبەست دەستبەکارببن.

 

ئەمڕۆ سێشەممە 30ی ئایاری 2023 وەزارەتی کار و کاروباری کۆمەڵایەتی لەسەر راسپاردەی کوێستان محەمەد، وەزیری کار و کاروباری کۆمەڵایەتی چەند هەلی کارێک بۆ کۆمەڵێک دەرچووی دانەمەزراو رادەگەیەنێت بەشێوەی گرێبەستی نا حکومی لەگەڵ رێکخراوە نێودەوڵەتییان کە کار و چالاکیی لەگەڵ وەزارەت ئەنجام دەدەن.

 

لە راگەیەندراوەکەدا هاتووە "چالاکییەکان بۆ زیاتر خزمەتکردنی دامەزراوە کۆمەڵایەتییەکان دەبێت و لە (خانەکانی منداڵانی بێسەرپەرشت و پیر و پەککەوتەکان و سەنتەرەکانی منداڵان و ماڵەکانی داڵدەدانی ژنانی ھەڕەشە لێکراو و سەنتەرەکانی راھێنان) دەبێت".

 

ئاماژە بەوەشدراوە "لە کۆبوونەوەی رۆژی 29ی ئایاردا بە میکانزمێکی گونجاو و روون بڕیاردرا تا شایستەترینەکان دیاری بکرێن و لەکۆتاییدا  لیژنەیەکی تایبەت بۆ وەرگرتنی فۆڕم و چاوپێکەوتن بەمەبەستی دامەزراندن کارەکان ئەنجام بدەن".

 

مەرجەکانی پێشکەشکردن بریتین لەم خاڵانەی خوارەوە: 
 
1- پێویستە خوازیار تەمەنی لە 40 ساڵ زیاتر نەبێت.

 

2- پێویستە خوازیار دانیشتووی (سەنتەری شاری ھەولێر) بێت.

 

3- پێویستە خوازیار زانیاریی راست و درووست پێشکەش بکات و لە ئەگەری تۆمارکردنی زانیاریی هەڵە و نادرووست داواکاریی دامەزراندنی رەتدەکرێتەوە.

 

4- نابێت خوازیار مووچەخۆر بێت لە هیچ دامودەزگایەکی حکومی و کەرتی تایبەتدا.

 

5- ئارەزوومەند پێویستە ئەم بەڵگەنامانە و کۆپییەکانیان لە رۆژی سەردانکردنی ئامادە بکات (کارتی نیشتیمانی، کارتی زانیاری، پشتگیری موختاری گەڕەک،  بڕوانامە یاخود پشتگیری دەرچوون) .

 

6- پێویستە خوازیار زمانی ئینگلیزی بزانێت و توانای (نووسین، خوێندنەوە، قسەکردن)ی ھەبێت.

 

7- پێویستە خوازیار توانای بەکارھێنانی کۆمپیتەری ھەبێت.

 

وەزارەتی کار و کاروباری کۆمەڵایەتیی باسی لەوەشکردووە "پرۆسەی پێشکەشکردنی داواکاری دامەزراندن (سیڤی) بە چەند قۆناغێک دەبێت".

 

قۆناغی یەکەم/ دەرگای پێشکەشکردنی داواکاریی دامەزراندن راستەوخۆ دەبێت لە نوسینگەی تایبەتی وەزیر بۆ ماوەی یەک ھەفتە پاشان بەڵگەنامەکانی لەگەڵ هاوپێچ بکرێت لەناو فایلێک، لە رۆژی سێشەممە، 30ی ئایاری2023 لە کاتژمێر 8:30 تا 01:00، لە دیوانی وەزارەتی کار و کاروباری کۆمەلایەتی - شەقامی گشتیی شۆرش.

 

قۆناغی دووەم/ لەلایەن لیژنە تایبەتمەندەوە چاوپێکەوتن و خاڵبەندی دەکرێت بۆ دەستنیشانکردنی کەسە شایستەکان.

ر.ع