مەودا میدیا-

هه‌ڤین که‌مال شامحەمەد، پزیشکی پسپۆڕ له‌ زانستی ئازار و به‌نج و شاره‌زا له‌ چاره‌سه‌ری فه‌قه‌رات و نه‌خۆشی جومگه‌کان بێ نه‌شته‌رگه‌ری، لە ھەژماری تایبەتی خۆی لە فەیسبووک سەبارەت  بەو خۆراکانەی کە یارمەتیدەرە بۆ کەمکردنەوەی گرژی ماسولکەکان، کۆمەڵێک  زانیاریی دەخاتەڕوو.

 

ئەو پسپۆڕە ئاماژەی بەوەکردووە "یەکێک لە هەرە کێشە باوە تەندروستییەکانی ئەم سەردەمە، دروستبوونی گرژی ماسولکەکانە، بەتایبەت ماسولکەکانی پوز و شان و مل، کە زۆربەی جار هۆکارەکەی دەگەڕێتەوە بۆ ماندووبوون و لایف ستایلی خراپ، کەمی خواردنەوەی ئاو و زیاد خۆری لە خواردنی فاست فوود و ناتەندروست".

 

ئاشکراشیکردووە "لە ئێستادا نێرگەلە کێشان و جگەرەی ئەلەکترۆنی و جگەرەی ئاسایی بەهەمان شێوە کاریگەری زۆریان هەیە و خواردنەوەی رێژەیەکی زۆریش لە چا و قاوە و خواردنەوە گازییەکان کاریگەری خراپیان هەیە، ئەمانە و چەندەها هۆکاری تر و نەخۆشی ماسولکەکان لەوانەیە گرژی دروست بکەن".

 

پزیشکەکە رێگەچارەسەرەکانی ئاشکرا کردووە بە خواردنی چەند جۆرە خۆراکێک و خواردنەوەیەک کە پێویستە لە ژەمەکاندا پەیڕەو بکرێن بۆ ئەوەی گرژی ماسولکەکان کەمبکرێنەوە، ئەوانیش:

1- پەتاتەی شیرین، لەبەر ئەوەی ماددەی کالسيۆم و مەگنیسيۆم و پۆتاسيۆمی تێدایە کە گرژی و رەقبوونی ماسولکە ناھێڵێت.

2- ئاڤۆگادۆ کە رێژەیەکی زۆر پۆتاسیۆمی تێدایە کە ماسولکە خاوکەرەوەیە.

3- پاقلەمەنییەکان، فاسۆلیا، لۆبیا، کە رێژەیەکی زۆر مەگنیسیۆمی تێدایە کە ئازاری ماسولکە ناھێڵێت .

4- شووتی یاخود شەربەتەکەی کە ناھێڵێت ماسولکەکان وشک ببنەوە، چونکە رێژەیەکی زۆر ئاوی تێدایە .

5- شیر یاخود شیرەمەنییەکان کە رێژەیەکی زۆر پرۆتینی تێدایە کەیارمەتی دروستبوونەوەی خانە تێکشکاوەکانی ماسولکە دەدات.

6- سرکەمەنی یاخود ترشیات و خەیار شۆر، کاریگەری ھەیە لەسەر تەحفیز کردنی دەمارەکان کەئەویش دەبێتە ھۆی نەھێشتنی ئازار و رەقبوونی ماسولکەکان .

7- سەوزە گەڵا تۆخەکانی وەکو سڵق و کاھوو و سپێناغ و ..ھتد، کە رێژەیەکی زۆر کالستۆم و ماگنیسیۆمیان تیێدایە.

8- پرتەقاڵ و نارنج و سندی، رێژایەکی زۆر ئاو پۆتاسیۆمیان تێدایە کەیارمەتی خاوکردنەوەو باشتر بوونی ماسولکەکان دەدەن .

9- چەرەزات، بەھەموو جۆرەکانییەوە سەرچاوەیەکی باشن بۆ مەگنیسیۆم.

10- ماسی، بەتایبەتی جۆری سەلەمۆن کە چەورییەکەی هانی چالاکبوونی سوڕی خۆێن دەدات کە کاریگەری ھەیە لەسەر کاری ماسولکەکان .

11- تەماتە، کە رێژەیەکی زۆر پۆتاسیۆمی تێدایە، کە یارمەتی خاوکردنەوەی ماسولکەکان دەدات.

 12- ئاو، خواردنەوەی ئاو بەرێژەی زۆر 12 پەرداخ و زیاتر لە رۆژێکدا، رێگری دەکات لە ووشکبوونەوەی ماسولکەکان و ئیش وکاریان چالاک دەکات .

پ ح ع