مەودا میدیا-

ئەندامێکی پەرلەمانی عیراق ئاشکرایکرد ئەگەر کێشە دروست نەکرێت لە رۆژانی داهاتوودا وەزارەتی دارایی عیراق مووچەی فەرمانی هەرێمی کوردستان دەخاتەسەر هەژماری حکومەتی هەرێم.

دارا سێکانیانی، ئەندامی پەرلەمانی عیراق رایگەیاند "لەگەڵ خەرجکردنی مووچەی مانگی (ئایار/5)ی فەرمانبەران مووچەی پێنج مانگی ئەو فەرمانبەرانەش بەسەریەکەوە خەرج دەکرێت کە چەند مانگێکە مامەڵەی خانەنشینیان بۆکراوەو تاوەکو ئێستا مووچەیان وەرنەگرتووە".

ئاماژەی بۆ ئەوەشکرد "ماوەی نزیکەی سی مانگە فەرمانبەرانی هەرێمی کوردستان مووچەیان وەرنەگرتووەو لە ماوەی 11 ساڵی رابردووشدا لە دۆخێکی خراپی بژێویدان، بۆیە ناکرێت حکومەتی هەرێم و لایەنێک هاتنی مووچە بکاتە دەستکەوت".

ئەوەشی خستەڕوو "لە ساڵانی رابردوو خەڵکی هەرێمی کوردستان داوای مافەکانی خۆی کرد بە گوللە وەڵام درایەوە، ئیتر کاتی ئەوە هاتووە کۆتایی بە چەوساندنەوەی خەڵک و فەرمانبەران لە پاشەکەوت و نیوەمووچە بهێنرێت".

ب ح