مەودا میدیا-
بژمێرەكانی هەرێمی كوردستان كە لە سەرژمێری گشتی عیراق بەشدارییان كردووە هەڵمەتێكیان بۆ كۆكردنەوەی واژۆ بە مەبەستی دامەزراندنیان دەستپێكردووە. 

جیهاد جەلال، نوێنەری گشتی بژمێرەكانی هەرێم بە مەودا میدیای راگەیاند"لەمڕۆوە دەستیان كردووە بە كۆكردنەوەی واژۆی بژمێرەكانی هەرێمی كوردستان بە دوو مەبەست، كە یەكێكیان دامەزراندنیان و ئەویتریشیان خەرجكردنی بڕی 250 هەزار دیناری مووچەی مانگی 12یە كە خوراوە و نەیاندراوەتێ‌". 

وتیشی"لە هەرێم جگە لەوەی كە مووچەی مانگی 12یان نەدراوەتێ‌، هەندێك لەو پێداویستییانەشیان پێنەدراوە كە لەلایەن حكومەتی عیراقەوە بۆیان رەوانە كراوە وەك هێلەك و شتی دیكەش". 

ئاماژەی بۆ ئەوەشكرد"لە پرۆسەی سەرژمێرییەكەدا مامۆستایان هەبووە كە بە پارەی خۆی مەسروفاتی كردووە و چووە بۆ لادێكان بۆ سەرژمێری، بەڵام تا ئێستا پارەكەی بۆ سەرف نەكراوەتەوە". 

باسی لەوەشكرد"ژمارەی بژمێرەكانی هەرێمی كوردستان 27 هەزار كەسن كە لەو ژمارەیە 18,500 كەسیان دانەمەزراون و ئەوەشی دەمێنێتەوە مامۆستایانی دامەزراون". 
ئ پ